प्रहरीलाई महानिरीक्षक कुँवरको निर्देशन : दबाब  र प्रभावमा नपरी काम गर्नू

---

नयाँ पेज

२०८१ मङ्सिर ८ शनिबार २१:५६ बजे

काठमाडौं । प्रहरी महानिरीक्षक बसन्तबहादुर कुँवरले कसैको दबाब वा प्रभावमा नपरी काम गर्न निर्देशन दिएका छन्। आज (शनिबार) नुवाकोट जिल्ला प्रहरी कार्यालय परिसरमा निर्माण भएका मन्दिर र नागरिक सहायता कक्षको उद्घाटन गर्दै महानिरीक्षक कुँवरले प्रहरीको सेवा प्रवाहलाई थप प्रभावकारी, पारदर्शी र जनमुखी बनाउँदै लैजानु पर्ने बताए ।

उनले प्रहरी र नागरिकबीचको सम्बन्ध सुमधुर र सुदृढ रहेमात्र समाजमा अपराधहरूलाई निर्मूल पार्न सकिने बताए ।सीमित साधन स्रोतका बाबजूद पनि प्रहरीले आफ्नो शत प्रतिशत योगदान दिने प्रयास हरदम गरिरहेको भन्दै उनले पछिल्लो समय प्रत्याशित वा अप्रत्याशित रूपमा आएका वा आउन सक्ने विपद्जन्य घटना सबैको चुनौतीको रूपमा देखिएका बताए ।

उनले समाजमा अशान्ति र अराजकता फैलाउने आपराधिक समूह, गैरकानूनी र अनैतिक कार्य गर्ने व्यक्ति वा समूहहरू, सामाजिक संजालको दुरूपयोग गर्ने व्यक्तिहरू विरूद्ध खरो रूपमा प्रस्तुत भई कुनै पनि किसिमको दवाव र प्रभावमा नपरी उत्कृष्ट कार्यसम्पादन गर्न कटिवद्ध रहन प्रहरी कर्मचारीहरुलाई निर्देशन दिए ।