ममता बनर्जी नयाँ दिल्लीबाट पक्राउ

जन्तरमन्तर जान खोज्दा प्रहरीको अवरोध

---

नयाँ पेज

२०८३ असोज २४ शनिबार १६:५४ बजे

नयाँदिल्ली :  पश्चिम बंगालकी पूर्वमुख्यमन्त्री तथा तृणमूल कांग्रेस (टीएमसी) की प्रमुख ममता बनर्जीलाई दिल्ली प्रहरीले नियन्त्रणमा लिएको छ ।

टीएमसीका प्रवक्ता साकेत गोखलेले सामाजिक सञ्जाल एक्समार्फत बनर्जीसहित पाँच जनालाई दिल्ली प्रहरी र केन्द्रीय रिजर्भ प्रहरी बल (सीआरपीएफ) ले नियन्त्रणमा लिएको जानकारी दिएका छन् ।

गोखलेका अनुसार उनीहरूलाई मुख्यमन्त्री निवासबाहिरबाट नियन्त्रणमा लिएर प्रहरी भ्यानमा राखिएको थियो । त्यसपछि उनीहरूलाई अज्ञात स्थानतर्फ लगिएको उनले बताएका छन् । घटनाप्रति प्रतिक्रिया दिँदै गोखलेले भारतमा लोकतन्त्रको मृत्यु भएको टिप्पणी गरेका छन् ।

समाचार एजेन्सी पीटीआईका अनुसार बनर्जीसहित टीएमसीका अन्य नेताहरूले दिल्लीको साउथ एभिन्यूस्थित बस बिसौनीमा धर्ना दिएका थिए । धर्नापछि प्रहरीले उनीहरूलाई नियन्त्रणमा लिएको हो ।

प्रहरीले नियन्त्रणमा लिनुअघि बनर्जीले आफूहरू जन्तरमन्तर जान चाहेको तर प्रहरीले रोकेको बताएकी थिइन् । उनले भारतको वर्तमान अवस्थालाई आपत्कालीन अवस्थाभन्दा पनि खराब भएको टिप्पणी गरेकी छन् ।