तीनकुने घटनालाई लिएर गृहमन्त्रीलाई संसदीय समितिमा बोलाइयो

---

नयाँ पेज

१६:०३ बजे

काठमाडौं । प्रतिनिधिसभाअन्तर्गतको राज्य व्यवस्था समितिले चैत्र १५ गते भएको घटनाका विषयमा सरकारको जवाफ माग्ने निर्णय गरेको छ । बुधबार सिंहदरबारमा बसेको बैठकमा समिति सदस्यहरुले राजावादीको प्रदर्शनका भएको घटनाका विषयमा गृहमन्त्रीले जवाफ दिनुपर्ने माग गरेपछि समितिले चैत २२ गते शुक्रबारको बैठकमा गृहमन्त्रीलाई बोलाउने निर्णय गरेको हो ।

बैठकमा सांसदहरूले चैत्र १५ गते शुक्रबार भएको घटनाका बारेमा सरकारले स्पष्ट पार्नुपर्ने बताएका थिए । उनीहरुले उक्त घटनाको न्यायीक छानविनको समेत माग गरेका छन् । कांग्रेस सांसद विश्वप्रकाश शर्माले तीनकुने घटनाको छानबिनका लागि सरकारले न्यायिक छानविन समिति बनाउनु पर्ने बताए । उनले तीनकुने घटनामा सरकारको बुझाइ समिति समक्ष आउनुपर्ने बताए ।

त्यस्तै माओवादी केन्द्रका प्रमुख सचेतक हितराज पाण्डेले तीनकुने घटनामा सरकारको कमजोरी देखिएको भन्दै गृहमन्त्रीले जवाफ दिनुपर्ने बताए । आफ्नै प्रहरीले घेरामा रहेका बेलामा दुर्गा प्रसाईंलाई समात्न नसक्ने र अहिले छिटो पक्राउ गछौं भन्दा कसैले पत्याउन नसक्ने उनले बताए ।

त्यस्तै राप्रपाका सांसद बुद्धिमान तामाङले १५ गतेको घटनामा एकपक्षीय रुपमा राजावादीप्रति खनिएको भन्दै निष्पक्ष न्यायीक छानविन हुनुपर्ने माग गरे । राप्रपाका नेताहरू समेत उक्त प्रदर्शनमा जाने तयारी गरे पनि दुर्गा प्रसाईंको फोटो देखेपछि नगएको उनले बताए । उनले कार्यक्रम सुरू नहुँदै मञ्चमा अश्रुग्यास प्रहार गरेको देखिएको धारणा राखे ।
सांसद तामाङले आफ्ना नेताहरुलाई समेत भएभरका कानुन लगाएर थुन्ने काम भएको जिकिर गरे । त्यस्तै अन्य सांसदहरूले राज्य व्यवस्था समितिको क्षेत्राधिकारभित्र पर्ने चैत्र १५ गतेको घटनालाई प्राथमिकतामा नराखेको भन्दै सभापतिको चर्को आलोचना गरेका थिए ।