.gif)
 (1).png){kind=logo}
.png)
ट्रकबाट बरामद २५ करोडका मालिक पहिचान
काठमाडौँ । गत चैत ४ गते राति काठमाडौँको टोखास्थित झोरमा ट्रकबाट बरामद २५ करोड बराबरको डलर र युरोको मालिकको पहिचान भएको छ । प्रहरीको इन्टिलिजेन्स र विज्ञ अनुसन्धानबाट शंका गरिएका व्यक्तिको पहिचान खुलेको हो । प्रहरीको अनुसन्धानबाट उक्त रकम सिन्धुपाल्चोकको भोटेकोशी गाउँपालिका–४ स्थायी घर भई टोखा नगरपालिका–१० बस्ने नारायण पौडेलको भएको खुल्न आएको छ ।
ना ख १६५२ नम्बरको ट्रकमा लुकाएर लाँदै गरेको अवस्थामा प्रहरीले सिन्धुपाल्चोकका ४३ वर्षीय चालक कुसान लामालाई पक्राउ गरेको थियो । भोटेकोशी गाउँपालिका–१ का लामाले चालक सिट पछाडि फल्स बटम बनाएर रकम राखेको अवस्थामा प्रहरीले पक्राउ गरेको थियो ।
काठमाडौँ उपत्यका अनुसन्धान कार्यालय, टेकुले उक्त व्यक्तिलाई पक्राउ गरेर जिम्मा लगाउन प्रहरीलाई पत्राचार समेत गरेको छ । उनको मोबाइल नम्बरको सीडीआर विश्लेषण गर्दै अनुसन्धान अघि बढाइएको प्रहरीले जनाएको छ।केन्द्रीय प्रहरी अनुसन्धान व्युरो (सीआईबी) का निमित्त प्रमुख डीआईजी चन्द्रकुवेर खापुङले आफूहरुलाई राजस्व अनुसन्धान वा कुनै पनि निकायले यसबारेमा ताकेता नगरेको बताए ।
डीआईजी खापुङका अनुसार राजस्व अनुसन्धानले के, कसरी व्यक्ति पहिचान गरेको छ, त्यस आधारमा मात्रै कसरी र कस्तो कारबाही अगाडि बढाउने भन्ने कुराको निक्र्योल हुनसक्छ । उनले भने, ‘संगठित अपराधको महल आकर्षित हुने एउटा अवस्था हुन्छ, सम्पत्ति शुद्धीकरण (मनी लाउन्डरिङ) को मुद्दा लाग्ने अर्को कुरा हुनसक्छ ।’ तर औपचारिक रुपमा प्रहरीलाई कसैले पनि अनुरोध वा निर्देशन नदिएको अवस्थामा मुद्दाबारे केही भन्न नसकिने उनले बताए । ‘सरकारले जिम्मेवारी दियो भने हामी काम गर्छौं’, डीआईजी खापुङले भने, ‘तर अहिलेसम्म केही आएको छैन ।’
