कर्मचारीको बलमा महानगर छिरे बालेनले हटाएका प्रमुख प्रशासकीय अधिकृत गुरागाई

---

नयाँ पेज

०७:३२ बजे

काठमाडौं । मेयर बालेन शाहले हटाएका काठमाडौं महानगरका प्रमुख प्रशासकीय अधिकृत सरोज गुरागाई कार्यालय छिरेका छन् । झण्डै साढे ३ महिनापछि बिहीवार पौने १२ बजे उनी महानगरको कार्यालय पुगेका हुन्। केही जनप्रतिनिधि र कर्मचारीको सहयोगमा उनी महानगर प्रहरीको अवरोध हटाउँदै कार्यालय प्रवेश गरेका हुन् ।

अवरोध गर्न नगर प्रहरी खटाइए पनि गुरागाईको स्वागतमा बसेका कर्मचारीले उनलाई कार्यालय प्रवेश गराएका हुन्।गुरागाईको स्वागत गर्न आयोजित कार्यक्रममा सरसफाइ कर्मचारी संगठनका मचाबाबु महर्जनले कार्यकारी नहुँदा आफूहरू तलब बानबाट वञ्चित बनेको बताए । 

‘कार्यकारी सर नहुँदा ३ महिनादेखि तलब खान नपाएर भोकभोकै छौं, यो आन्दोलन होइन कसैका विरुद्धमा होइन,’ उनले भने । अन्य कर्मचारीले कार्यकारी अधिकृतमाथि अवरोध नगर्न नगर प्रहरीलाई चेतावनी दिएका थिए । अनियमितता गरेको भन्दै गुरागाईलाई पुस ५ गतेदेखि कार्यालय प्रवेशमा अवरोध गरिएको थियो ।  
 

साढे तीन महिनापछि कार्यालय फर्किएका प्रशासकीय अधिकृत बालेन्द्र साहलाई काठमाडौं महानगरपालिकाका जनप्रतिनिधि र कर्मचारीले स्वागत गरेका छन् । मेयर बालेन्द्र साह बाहेकका जनप्रतिनिधिहरु प्रशासकीय अधिकृतको स्वागतमा खडा भएका हुन् ।

स्वागत गर्नेमा महानगरकी उपप्रमुख सुनिता डंगोल पनि रहेकी छन् । उपमेयर डंगोलले पहिल्यैदेखि यो विषयमा मेयर साहप्रति असन्तुष्टि राख्दै आएकी थिइन् । प्रशासकीय अधिकृतलाई काम गर्न दिनुपर्ने उनको अडान थियो । कर्मचारी र जनप्रतिनिधिले घेराउमा राखेर गुरागाईँलाई कार्यकक्षतिर लगेका थिए ।