.gif)
 (1).png){kind=logo}
.png)
नगर प्रहरी प्रमुख पाण्डे आक्रोशित : सुरक्षा ‘थ्रेट’ भएमा हामी सबैलाई रोक्छौ
काठमाडौं । काठमाडौं महानगरपालिकाका नगर प्रहरी प्रमुख राजु पाण्डेले सुरक्षा थ्रेट भएमा जुनसुकै पदाधिकारीलाई कार्यालयमा छिर्न रोक्ने बताएका छन् । आज प्रमुख प्रशासकीय अधिकृत सरोज गुरागाईलाई कार्यालयभित्र प्रवेश गराउने क्रममा नगर प्रहरी र कर्मचारीबीच टकराब भएको थियो ।
त्यही क्रममा सञ्चारकर्मीहरूसँग बोल्दै उनले सो कुरा बताएका हुन् । कर्मचारीले प्रशासकीय अधिकृतको कार्यकक्षको ढोकामा लागेको ताल्चा फुटाउने प्रयास गर्दा फेरि नगर प्रहरीले हस्तक्षेप गरेको थियो । त्यस क्रममा ढोकाको सिसा फुटेपछि नगर प्रमुख पाण्डे आक्रोशित बनेका थिए । उनले कर्मचारीलाई आफ्नो ठाउँमा बसेर काम गर्न चेतावनी दिए ।
उनले भने, ‘हामी कर्तव्य छोड्दैनौं । एक वर्षसम्म भोकै बस्न परे पनि हामी कर्तव्यबाट भाग्दैनौं । प्रहरीको काम नै सुरक्षा दिने हो । हामीले सुरक्षा दिने हो । सुरक्षा थ्रेट भएमा जुनसुकै पदाधिकारीलाई हामी छिर्न दिँदैनौं ।’ ‘हामीलाई दिएको आदेश अक्षरंशः पालना गर्छौं, तर,यस्तो तामझाम गरेर ठिक भएन, हामी पनि महानगरकै कर्मचारी हो, राजनीतिक भाषा बोल्दैनौं, कार्यालयको सुरक्षा गर्ने जिम्मा हाम्रो हो, हामी पनि तीन महिनादेखि तलब पाएका छैनौं, तर पछि हट्दैनौं, चाहे ६ महिना होस् चाहे एक वर्ष नै भोकै बस्न परोस्, त्यसैले प्रहरी भनिएको हो ।’
सरकारले प्रमुख प्रशासकीय अधिकृतमा सरोज गुरागाईलाई नियुक्त गर्ने निर्णय गरेसँगै गत असोज ७ गते महानगरका प्रमुख प्रशासकीय अधिकृतमा पदबहाली गरेका थिए । तर, उनलाई पुरानो बसपार्कस्थित काठमाडौं टावरको प्रक्रिया पूरा नगरी भवन निर्माणको नक्सा स्वीकृत गरेको आरोप लाग्यो । त्यसपछि महानगरपालिकाले उनीमाथि गत पुसमा छानबिन गर्न समिति गठन गर्यो । त्यसयता उनी निलम्बनमा परेका थिए ।
संघीय मामिला तथा सामान्य प्रशासन मन्त्रालयले महानगरपालिकालाई प्रमुख प्रशासकीय अधिकृतका रूपमा गुरागाईलाई नै काम गर्ने वातावरण दिन आग्रह गरेको थियो तर महानगरपालिकाका प्रमुख बालेन शाहले ठाडै अस्वीकार गरेका थिए । उनै प्रमुख प्रशासकीय अधिकृत गुरागाईले यसअघि काठमाडौं महानगरमा फर्केर काम नगर्ने र अन्तै सरुवाका लागि सरकारसँग माग गरेका थिए । तर, उनी महानगरको कार्यालयमा छिरेका छन् । महानगरका प्रहरीहरूले रोक्न खोजेका थिए । तर, सकेनन् । गुरागाईंको स्वागतमा महानगरपालिकाका उपप्रमुख सुनिता डंगोल पनि सहभागी थिइन् ।
