.gif)
 (1).png){kind=logo}
.png)
अज्ञात समूहद्वारा घरमै सुतिरहेका वृद्धको हत्या
संखुवासभा । संखुवासभाको खाँदबारी नगरपालिका–९ तुम्लिङटारमा अज्ञात समूहको आक्रमणबाट घरमा सुतिरहेका एक वृद्धको मृत्यु भएको छ । आक्रमणबाट गम्भीर घाइते ७२ वर्षीय मीनबहादुर कुमालको मृत्यु भएको जिल्ला प्रहरी कार्यालय संखुवासभाका प्रहरी नायब उपरीक्षक दक्षकुमार बस्नेतले जानकारी दिए । घटना अनुसन्धानका लागि धरानबाट तालिम प्राप्त कुकुर ल्याइएको छ ।
अपरिचित समूहको आक्रमणबाट गम्भीर घाइते वृद्ध कुमालको मनकामना सामुदायिक अस्पतालमा पुर्याउनु अघि नै मृत्यु भएको हो । आफ्नै घरमा सुतिरहेका कुमालको गए राति साढे १२ बजेतिर अपरिचित दुई जनाको समूहले घाँटीमा थिचेर गम्भीर घाइते बनाएका थिए । कुमाललाई अस्पताल लैजाने क्रममा मृत्यु भएको हो । बरण्डा कोठामा सुतिरहेका कुमालाई आक्रमण गरेको आवाज थाहा पाएपछि घरभित्र सुतिरहेकी श्रीमती सुनामाया कुमाल बाहिर निस्किएकी थिइन् । बाहिर निस्कँदा श्रीमानलाई दुई जनाले आक्रमण गरेको देखेपछि उनले छिमेकीलाई खबर गरेपछि छिमेकी घटनास्थल पुगेका थिए ।
घटनास्थलमा मृतक कुमाल घाइते अवस्थामा देखेपछि उनीहरूले घाइतेलाई अस्पताल लगेको प्रहरी निरीक्षक लामिछानेले जानकारी गराए । घटना लगत्तै फरार भएका व्यक्तिहरूको खोजी भइरहेको जनाएको उनले बताए । वृद्धको हत्या के कारण भएको भन्ने अहिलेसम्म खुल्न सकेको छैन । घटना लगत्तै जिल्ला प्रहरी कार्यालयका प्रहरी प्रमुख प्रहरी नायब उपरीक्षक दक्षकुमार बस्नेतसहितको टोली खटिएको थियो । फरार अभियुक्तहरूको खोजीका लागि सबै नाका शिल गरिएको प्रहरीले जनाएको छ । मृतक कुमालको घरमा श्रीमतीसहित बस्दै थिए । मृतकका दुई छोरा विदेशमा छन् ।
