नेकपा एसको युवा संघमा फेरि ‘बबण्डर’ 

माधव नेपालले मनोमानी गरेको भन्दै झलनाथका छोरासहितको विरोध

---

नयाँ पेज

२०८२ बैशाख २८ आइतबार १४:५५ बजे

काठमाडौं । नेकपा (एकीकृत समाजवादी) निकट युवा संघ नेपालमा फेरि ‘बबण्डर’ मच्चिएको छ । संघका इञ्चार्ज लक्ष्मण केसीले जारी गरेको बक्तव्य अनुसार रोशन थापा आयोजक समितिका संयोजक तोकिएपछि विवाद भएको हो ।

समितिमा कुनै छलफल एवं रायसल्लाह बिना गरिएको निर्णय मान्य नहुने उनीहरुले जनाएका छन् । नेकपा एसका अध्यक्ष माधवकुमार नेपालले युवा संघको मामिलामा मनोमानी गरेको भन्दै सम्मानित नेता झलनाथ खनालका छोरा निर्भिक चित्रकार खनालसहितका नेताले सार्वजनिक रुपमै अभिव्यक्ति दिएका छन् ।

नेकपा एसले पार्टीको केन्द्रीय सदस्य रहेका जनसंगठनका अध्यक्ष जिम्मेवारीमुक्त हुने मापदण्ड बनाउँदै गत माघमा अखिलकी अध्यक्ष आरती लामा र युवा संघ अध्यक्ष कृष्ण विकलाई हटाइएको थियो । लामा र विक दुबै झलनाथ पक्षका हुन् ।

संघका उपमहासचिवद्धय संजीप राई, निर्भिक खनाल र सचिवद्धय भेषराज शाह र अनिल बोगटीले आज संयुक्त बिज्ञप्ती जारी गर्दै निर्णय सच्याउन माग गरेका छन् । ‘निर्णय नसच्चाए युवा संघ नेपालको विधान, पद्धति र प्रक्रियाको पालना गर्दै युवा आन्दोलनलाई गलत दिशाबाट जान रोक्न हाम्रो जिम्मेवारी र जवाफदेहिताको बोधगरी यो गलत अभ्यास र निर्णयका सम्बन्धमा हामी कडा कदम चल्न वाध्य हुने कुरा जानकारी गराउँदछौ’ उनीहरुले जारी गरेको विज्ञप्तीमा उल्लेख गरिएको छ ।  

इञ्चार्ज केसीले तोकेको आयोजक समितिमा सहसंयोजक धर्म शाही र संजीव राई छन् । आयोजक समितिलाई पूर्णता दिन थापाकै संयोजकत्वमा कार्यदल पनि बनेको छ । कार्यदलमा संयोजक थापा सहित धर्म शाही, सञ्जीव राई, नरेश गिरी, प्रेम प्रधान र फइन्द्र तामाङ सदस्य छन् ।

‘हाम्रो मातृ पार्टी नेकपा ( एकीकृत समाजवादी ) ले मिति २०८१÷ १०÷ १४ गते जारी गरेको अन्तर पार्टी निर्देशन–४ को बुदा न. ६ बमोजिम युवा संघ नेपालको तत्कालीन नेतृत्व र पदाधिकारीहरु पार्टी केन्द्रिय सदस्य भइसकेकाले युवा संघबाट बिदा गर्ने र इञ्चार्जलाई संगठनको सम्मेलनलगायतको कामको योजना बनाइ अगाडि बढाउने निर्देशन गरेको छ।

र हिजो इञ्चार्ज कमरेडले एकाएक, युवा संघमा बाँकी रहेका पदाधिकारीहरु एवं कार्यालय कमिटिका सदस्यहरु संग कुनै छलफल र  बैठक नै नगरी संयोजक, सहसंयोजकहरु  र पार्टी केन्द्रिय निकायको जिम्मेवारीमा रहेका कमरेडलाई समेत सदस्य तोकी कार्यदल बनाउने निर्णय गर्नु भएको प्रति हाम्रो घोर आपत्ति रहेको छ,’ जारी बिज्ञप्तीमा उल्लेख गरिएको छ।