दुर्गा प्रसाईका अर्का सहयोगी संग्रौला पक्राउ

---

नयाँ पेज

२१:४८ बजे

काठमाडौं । काठमाडौं तीनकुनेमा भएको राजावादी समूहको आन्दोलनका कमाण्डर दुर्गा प्रसाईका अर्का एक सहयोगी देवी संग्रौला पक्राउ गरेका छन् । काठमाडौं उपत्यका अपराध अनुसन्धान कार्यालयले उनलाई भैंसेपाटीबाट पक्राउ गरेको हो । झापा घर भएका संग्रौला दुर्गा प्रसाईको संयुक्त जनआन्दोलन घोषणा सभा परिचालन समितिका संयोजक हुन् । 

गत चैत १५ गते काठमाडौंको तीनकुनेमा भएको राजावादी समूहको प्रदर्शनमा अराजक गतिविधि गर्नेहरू पक्राउ पर्ने क्रम जारी छ । सो क्रममा संग्रौलालाई प्रहरीले पक्राउ गरेको हो । यही प्रदर्शनमा पक्राउ परेका ४१ जनालाई म्याद थप गरेर अनुसन्धान अघि बढाइएको छ ।

११ जनाविरूद्ध प्रहरीले राज्यद्रोहको कसुरमा अनुसन्धान अघि बढाएको छ । त्यस्तै बाँकी ३० जना र ती ११ जना सहितलाई आपराधिक उपद्रव र संगठित अपराध कसुरमा अनुसन्धान अघि बढाएको हो । जिल्ला अदालत काठमाडौंले उनीहरूमाथि अनुसन्धान गर्न आइतबार पाँच दिनको समय दिएको हो ।