कमल थापाको चेतावना : जोरजबरजस्ती गरिए सरकारका लागि पनि महङ्गो पर्नेछ

---

नयाँ पेज

१५:३२ बजे

काठमाडौं । राप्रपा नेपालका अध्यक्ष कमल थापाले सरकारलाई जोरजबरजस्ती नगर्न चेतावनी दिएका छन् । राप्रपा नेता बसन्तमान सिंह अधिकारीको १३औं दिनको पुण्यतिथिमा बिहीबार (आज) काठमाडौंमा आयोजित श्रद्धाञ्जली सभालाई सम्बोधन गर्ने क्रममा अध्यक्ष थापाले यस्तो चेतावनी दिएका हुन् ।

‘बढ्ता जोर–जबरजस्ती गर्न नखोजियोस्, त्यसो गरिए त्यो सरकारका लागि पनि महङ्गो पर्नेवाला छ’, उनले भने । उनले हिन्दूराष्ट्रको मान्यता र राजसंस्थासहितको प्रजातन्त्रको लागि राष्ट्रवादीहरू एक ठाउँमा उभिनुको विकल्प नरहेको पनि बताए ।

‘म देशभरका राष्ट्रवादी साथीहरूलाई आग्रह गर्न चाहन्छु– अहिले जसरी राजालाई बदनाम गर्ने, झुटा आरोप लगाउने, हिन्दूराष्ट्रको मान्यता र राजसंस्थासहितको प्रजातन्त्रको विचारलाई निषेध गर्ने, समाम्त पार्ने प्रयास भइरहेको छ, त्यसबाट सजक भएर आफ्नो आस्था र विचारको प्रतिरक्षाको निम्ति सबै राष्ट्रवादीहरू एक ठाउँमा उभिनु बाहेक अर्को विकल्प छैन,’ उनले भने । अध्यक्ष थापाले थुनामा रहेका राप्रपा वरिष्ठ उपाध्यक्ष रवीन्द्र मिश्र, महामन्त्री धवलशमशेर राणालगायतका नेताहरूको शीघ्र रिहाइको माग समेत गरेका छन् ।