त्रिचन्द्रको स्ववियु अध्यक्षमा नेविसंघका गगन निकट कोइराला निर्वाचित

काठमाडौं । त्रिचन्द्र क्याम्पसको स्वतन्त्र विद्यार्थी युनियन (स्ववियु) अध्यक्षमा नेविसंघका गोविन्द कोइराला निर्वाचित भएका छन् । स्ववियु अध्यक्ष जितेका कोइराला कांग्रेस महामन्त्री गगन थापा निकट हुन् । नेविसंघले यहाँ प्यानल नै जितेको नेविसंघका केन्द्रीय प्रवक्ता सुरज सेजुवालले जानकारी दिए ।
उनका अनुसार २,६७१ मत खसेकोमा कोइरालाले १,२१५ मत ल्याएर अध्यक्ष जितेका हुन् । स्वतन्त्र उम्मेदवार सागर न्यौपानेले ६८३ मत ल्याए भने अनेरास्ववियुका उम्मेदवार प्रमित विष्टले ४३१ मत ल्याएका छन् । यहाँ नेविसंघविरूद्ध सात संगठनले मोर्चाबन्दी गरेर उम्मेदवारी दिएका थिए ।
अनेरास्ववियु, अनेरास्ववियू, अखिल (क्रान्तिकारी), अनेरास्ववियु (क्रान्तिकारी बहुमत), अनेरास्ववियू (समाजवादी) लगायत विद्यार्थी संगठनले भागबण्डा गरी उम्मेदवारी दिएका थिए । ६ वटा कम्युनिष्ट घटक विद्यार्थी संगठन र एउटा आदिवासी जनजाति महासंघको विद्यार्थी संगठनले मोर्चा गरेर नेविसंघविरूद्ध खडा भएका थिए । नेविसंघ केन्द्रीय सभापति दुजाङ शेर्पाले सात वटा संगठनको मोर्चालाई हराउँदै नेविसंघका कोइराला स्ववियु अध्यक्ष निर्वाचित भएको जानकारी दिए ।