.gif)
 (1).png){kind=logo}
.png)
राष्ट्रिय सभामा दुईदिने बिदा खारेज गर्न माग, अदालतको बिदा पनि घटाउन प्रस्ताव
दुईदिने बिदादेखि होल्डिङ सेन्टरसम्म, राष्ट्रिय सभामा उठे सरकारसँग सम्बन्धित दर्जनौँ प्रश्न
काठमाडौं : राष्ट्रिय सभाको बुधबार बसेको बैठकमा सांसदहरूले सार्वजनिक बिदा, सुदूरपश्चिमको विकास, होल्डिङ सेन्टर र जनस्वास्थ्यलगायत विषयमा सरकारको ध्यानाकर्षण गराएका छन्। सांसद भुवनबहादुर सुनारले हप्तामा दुई दिन सार्वजनिक बिदा दिने व्यवस्था अव्यावहारिक भएको भन्दै तत्काल खारेज गर्न माग गरे। यसबाट अस्पताल र विद्यालयजस्ता संवेदनशील क्षेत्र प्रभावित भएको उनको तर्क थियो। उनले दसैँको १५ दिने अदालत बिदा घटाएर ६ दिनमा सीमित गर्न पनि माग गरे।
सांसद नारायणदत्त मिश्रले सुदूरपश्चिम विकासमा केन्द्र सरकारको उपेक्षा रहेको आरोप लगाउँदै सडक, अस्पताल, सिँचाइ र मलको व्यवस्था गर्न माग गरे। मदनकुमारी शाहले होल्डिङ सेन्टरमा रहेका विस्थापितको अवस्था दयनीय रहेको बताउँदै ११ जनाको मृत्यु र पछिल्लो समय दुई जनाले आत्महत्या गरेको उल्लेख गरिन्। उनले गरिब तथा भूमिहीनको स्थायी बसोवासको व्यवस्था गर्न माग गरिन्।
राजेन्द्रलक्ष्मी गैरेले पाल्पाको रामपुरमा वर्षाले पुर्याएको क्षति र बागमती किनारका सुकुम्बासीको सुरक्षाबारे सरकारको ध्यानाकर्षण गराइन्। युवराज शर्माले क्षयरोग, जापानीज इन्सेफ्लाइटिस र स्क्रब टाइफसलगायत रोगको प्रकोप, महँगी तथा अभाव नियन्त्रणका लागि प्रभावकारी कदम चाल्न सरकारसँग आग्रह गरे। सुरेशकुमार आले मगरले धर्मलाई व्यक्तिगत स्वतन्त्रताको विषयका रूपमा लिँदै राज्य धर्मनिरपेक्ष हुनुपर्ने धारणा राखे।
