मेसीको सम्मानमा एक मिनेट खेल रोकेर ताली बजाइने

मेसीको सम्मानमा १० औं मिनेटमा एक मिनेट खेल रोकेर ताली बजाइने

---

नयाँ पेज

२०८३ भदौ २० शनिबार १३:३७ बजे

काठमाडौं :  अर्जेन्टिनी फुटबल महासंघ (एएफए)ले राष्ट्रिय टोलीका स्टार खेलाडी लियोनल मेसीको सम्मानमा यसै साता हुने सबै फुटबल खेलमा पहिलो हाफको १०औँ मिनेटमा एक मिनेट खेल रोकेर ताली बजाउने कार्यक्रम घोषणा गरेको छ।

राष्ट्रिय टोलीबाट दोस्रोपटक सन्न्यासको घोषणा गरेका मेसीको सम्मानमा एएफएले पुरुष तथा महिला फुटबलका सबै डिभिजनका साथै अन्य विधाका आगामी खेलमा समेत यस्तो कार्यक्रम गर्न निर्देशन दिएको हो।

३९ वर्षीय मेसीले सोमबार अर्जेन्टिनाको राष्ट्रिय टोलीबाट सन्न्यासको घोषणा गरेका थिए। यसअघि उनले सन् २०१६ मा पनि अन्तर्राष्ट्रिय फुटबलबाट सन्न्यासको घोषणा गरेका थिए। तर, समर्थकको चर्को दबाबपछि उनले निर्णय फिर्ता लिँदै राष्ट्रिय टोलीमा पुनरागमन गरेका थिए।

पुनरागमनपछि मेसीले आफ्नो कप्तानीमा अर्जेन्टिनालाई फिफा विश्वकप र दुईपटक कोपा अमेरिकाको उपाधि दिलाए। उनको कप्तानीमा अर्जेन्टिना लगातार दोस्रोपटक विश्वकपको फाइनलमा समेत पुगेको थियो।

मेसीले अर्जेन्टिनाका लागि अधिकांश समय १० नम्बरको जर्सी लगाएका छन्। यही नम्बरलाई प्रतीकका रूपमा प्रयोग गर्दै एएफएले खेलको १०औँ मिनेटमा खेल रोकेर उनको राष्ट्रिय टोलीसँगको यात्राको सम्मान गर्न लागेको हो।

स्क्रिन जडान गरिएका रंगशालामा खेल सुरु हुनुअघि एएफएको आधिकारिक भिडियोसमेत प्रसारण गर्न निर्देशन दिइएको छ। राष्ट्रिय टोलीबाट सन्न्यास लिए पनि मेसीले व्यावसायिक फुटबललाई निरन्तरता दिनेछन्। उनी हाल डेभिड बेकह्यामको सहस्वामित्व रहेको इन्टर मियामीबाट खेलिरहेका छन्। मेसी र इन्टर मियामीबीच अझै दुई वर्षको सम्झौता बाँकी छ।

मेसीले इन्टर मियामीलाई पहिलोपटक एमएलएस कपको उपाधि जिताएका छन्। उनी लगातार दोस्रोपटक लिगको सर्वोत्कृष्ट खेलाडी (एमभीपी) समेत बनेका छन्।

विश्वकपको २३औँ संस्करणमा मेसीले आठ खेलमा आठ गोल गरेका थिए। उनको अन्तर्राष्ट्रिय गोलसंख्या १२५ पुगेको छ। विश्वकपका छ संस्करणमा उनले २१ गोल गरेका छन्।

मेसीले सोमबार इन्स्टाग्राममा दुई पृष्ठको फोटो पोस्ट गर्दै राष्ट्रिय टोलीबाट सन्न्यासको घोषणा गरेका थिए। सन्न्यासको निर्णयबारे उनले भनेका थिए, ‘सन्न्यासको निर्णय लिँदा धेरै सोचेको थिएँ। अब युवा खेलाडीलाई पनि अवसर दिनुपर्ने बेला आएको छ।’ राष्ट्रिय टोलीका लागि खेल्दा आफूले सधैँ सक्दो प्रयास गरेको र मैदानमा आफ्नो सबै कुरा दिएको पनि मेसीले बताएका थिए।