.gif)
 (1).png){kind=logo}
.png)
देउवा नेतृत्वको अघिल्लो समितिका सबैलाई केन्द्रीय सदस्य बनाउने कांग्रेसको निर्णय
वडा अधिवेशनमा सहभागी बने निवर्तमान केन्द्रीय सदस्यलाई कांग्रेसमा समेट्ने
काठमाडौं : नेपाली कांग्रेसले आगामी असोज ३ र ४ गते हुने वडा अधिवेशनमा सहभागी हुने १४औँ महाधिवेशनका निवर्तमान केन्द्रीय सदस्यहरूलाई वर्तमान केन्द्रीय समितिमा समेट्ने निर्णय गरेको छ।
आइतबार सानेपामा बसेको केन्द्रीय कार्यसम्पादन समिति बैठकले १५औँ महाधिवेशनको प्रक्रियामा सहभागी हुन नेता तथा कार्यकर्तालाई आह्वान गर्दै वडा अधिवेशनमा भाग लिने निवर्तमान केन्द्रीय सदस्यलाई केन्द्रीय समितिमा समेट्ने निर्णय गरेको हो। महामन्त्री प्रदीप पौडेलले असोज ३ गतेदेखि सुरु हुने वडा अधिवेशनमा सहभागी हुन सम्पूर्ण नेता तथा कार्यकर्तालाई आह्वान गरिएको बताए।
‘असोज ३ देखि सुरु हुने वडा अधिवेशनमा भाग लिन आह्वान गरेका छौं,’ उनले भने, ‘निवर्तमान केन्द्रीय सदस्यहरू वडा गएर अधिवेशनमा भाग लिनुभयो भने केन्द्रीय समितिमा समेट्ने निर्णय पनि भएको छ।’ कांग्रेसको संशोधित विधानअनुसार अब केन्द्रीय सदस्यहरू पनि सम्बन्धित वडाबाट निर्वाचित भएर आउनुपर्ने व्यवस्था छ। विगतमा जस्तो केन्द्रीय सदस्य स्वतः महाधिवेशन प्रतिनिधि हुने व्यवस्था हटाइएको छ।
बैठकपछि एक पदाधिकारीले अघिल्लो समितिमा रहेका सबैलाई केन्द्रीय समितिमा सहभागी हुन आह्वान गरिने जानकारी दिए। विशेष महाधिवेशनपछि देउवा नेतृत्वको अघिल्लो समितिमा रहेका कतिपय नेता नयाँ केन्द्रीय समितिमा समेटिएका थिएनन्। कार्यसम्पादन समितिको पछिल्लो निर्णयसँगै उनीहरूलाई पुनः केन्द्रीय समितिमा सहभागी हुने बाटो खुलेको छ।
कांग्रेसले आगामी १६ देखि १९ असोजसम्म १५औँ महाधिवेशन गर्ने मिति तय गरेको छ। त्यसअघि असोज ३ र ४ गते वडा तहको अधिवेशन गर्ने कार्यतालिका बनाइएको छ। महाधिवेशनको तयारीका क्रममा कांग्रेसले क्रियाशील सदस्यताको विषयमा समेत निर्णय गरेको छ। संस्थापन पक्षले गत पुससम्म नवीकरण गरिएका सबै क्रियाशील सदस्यलाई मान्यता दिने निर्णय गरेको छ।
अघिल्लो समितिका सबैलाई केन्द्रीय सदस्य बनाउने र उनीहरूलाई महाधिवेशन आयोजक समितिका रूपमा अघि बढाउने निर्णयसँगै कांग्रेसले आगामी महाधिवेशनको तयारीलाई थप व्यवस्थित रूपमा अघि बढाउने संकेत दिएको छ।
