सल्यानमा दिदी–बहिनी घरभित्रै मृत भेटिए

---

नयाँ पेज

१०:४४ बजे

 सल्यान । सल्यानमा दिदी–बहिनी नै आफ्नै घरभित्र मृत भेटिएका छन् । मृत भेटिनेमा बनगाड कुपिण्डे नगरपालिका–११, सिस्नेपालत भन्ने गाउँकी ३ वर्षीय करिष्मा राना र उनकी ६ महिनाकी बहिनी राघवी राना रहेका छन् । घटना आज (बुधबार) बिहानको भएको जिल्ला प्रहरी कार्यालय सल्यानले जानकारी दिएको छ।

उनीहरुका बाबु टेकमान राना रोजगारीका सिलसिलामा जिल्ला बाहिर रहेको र आमा पूर्णिमा राना घरमै भए पनि घटनाबारे अझै खुलिसकेको छैन । स्वास्थ्यमा कुनै समस्या नरहेका उनीहरु मृत अवस्थामा फेला परेकोले घटना शंकास्पद रहेको प्रहरीले जनाएको छ । प्रहरीले घटनाबारे अनुसन्धान अगाडि बढाइसकेको छ।