.gif)
 (1).png){kind=logo}
.png)
सुवेदी संयोजकत्वको समितिलाई राप्रपा नेपालले पूर्ण सहयोग गर्ने, उपाध्यक्ष पठाउने
काठमाडौं । राष्ट्रिय प्रजातन्त्र पार्टी नेपालले नवराज सुवेदी नेतृत्वमा राजसंस्था पुनर्स्थापनका लागि निर्देशक समिति गठन गरिएकोलाई स्वागत गरेको छ । तर, पार्टीका अध्यक्ष कमल थापा उक्त समितिमा नबस्ने भएका छन् ।
आज बसेको कार्यसम्पादन समितिको बैठकले सो निर्णय गरेको हो । समितिमा अध्यक्षको स्थानमा उपाध्यक्ष तारानाथ लुईंटेललाई पठाउने निर्णय भएको प्रवक्ता राजाराम बर्ताैलाले जनाएका छन् । समितिको नेतृत्वमा हुने आन्दोलनमा राप्रपा नेपालको पूर्ण सहयोग र सहभागिता रहने निर्णय पनि बैठकले गरेको छ ।
राप्रपा नेपालका निर्णयहरू
(क) हाल विद्यमान भ्रष्ट व्यवस्था र भ्रष्ट शासकबाट देशलाई मुक्त तुल्याउन, सनातन हिन्दूराष्ट्र र राजसंस्था पुनःस्थापना गर्न, संघीयता खारेज गर्न तथा सुशासनको माध्यमबाट आर्थिक समृद्धिको लक्ष्य हासिल गर्न समान विचारधारा भएका सबै राजनीतक दल र समूहका बिच एकता र सहकार्य कायम गरी संयुक्त जनआन्दोलनमा जानुपर्छ भन्ने राप्रपा नेपालको दृढ धारणा रहँदै आएको सर्वविदित छ। कुनै एक राजनीतिक दल वा समूहको प्रयासबाट मात्र यो लक्ष्य प्राप्त हुन सक्दैन भन्ने बारे हामी सचेत छौँ। विगत दुई वर्षदेखि त्यस्तो एकता र सहकार्यको वातावरण तयार गर्न राप्रपा नेपालले निरन्तर प्रयास गर्दै आएको छ ।
(ख) पूर्व राजा ज्ञानेन्द्रबाट प्रजातन्त्र दिवसका अवसरमा गत २०८१ साल फागुन ७ गते राष्ट्रको नाममा भएको सम्बोधनको भावनालाई आत्मसात गर्दै सनातन हिन्दूराष्ट्र र राजसंस्थाको पुनःस्थापना, संघीयताको खारेजी तथा भ्रष्टाचारको अन्त्य जस्ता मुख्य एजेण्डा बोकेर नवराज सुवेदीको संयोजकत्वमा संयुक्त जनआन्दोलन समिति गठन भएकोप्रति खुसी व्यक्त गर्दै सो जनआन्दोलनमा राप्रपा नेपालको पूर्ण सहयोग र सहभागिता रहने बैठक निर्णय गर्दछ ।
(ग) नवराज सुवेदी नेतृत्वको जनआन्दोलन समितिमा राप्रपा नेपालको तर्फबाट उपाध्यक्ष तारानाथ लुइँटेलले प्रतिनिधित्व गर्नु हुनेछ ।
(घ) उक्त समितिले निकट भविष्यमा आयोजना गर्ने आन्दोलनका सबै कार्यक्रमहरूमा तन मन र धनले सहभागी हुन राप्रपा नेपालका सबैतहका निकाय र भातृसंगठनहरूलाई राप्रपा नेपाल आह्वान गर्दछ ।
(ङ) वर्तमान राज्य प्रणालीको विगत दुई दशकको राजनीतिक अभ्यास, देशको वर्तमान अवस्था र जनताको भावनालाई दृष्टिगत गरी विद्यमान राजनीतिक प्रणालीमा आमुल सुधार गर्ने बारे गंभीर भएर सोच्न सबै राजनीतिक दल र सम्बद्ध सबैमा समेत राप्रपा नेपाल अनुरोध गर्दछ। राजासहितको प्रजातन्त्र’ निरंकुशता वा विगतको व्यवस्थातर्फको प्रतिगमन होइन नेपालको भूराजनीतिक अवस्था र धार्मिक, साँस्कृतिक, सामाजिक परिवेशमा अहिलेको भन्दा धेरै गुणा बढी उन्नत र अग्रगामी प्रजातन्त्र हो भन्ने राप्रपा नेपालको मान्यता रहेको छ। राष्ट्रिय सहमति हुने हो भने वर्तमान संविधान कै परिधिभित्रबाट नै सनातन हिन्दू अधिराज्यको मान्यतामा आधारित राज्य व्यवस्था कायम गर्न सकिने छ । यो समयको माग र देशको आवश्यकता हो ।
(च) हिन्दूराष्ट्र र राजसंस्था पुनःस्थापना तथा सबल र समृद्ध नेपाल निर्माणको आन्दोलनमा सहभागी हुन सम्पूर्ण नेपाली दाजुभाई दिदीबहिनीहरूमा समेत राप्रपा नेपाल अपिल गर्दछ ।
