.gif)
 (1).png){kind=logo}
.png)
कालिमाटीमा मध्यराति युवकले महिलाको शव ल्याएर सडकमा फ्याँकेपछि ...
काठमाडौं । काठमाडौंमा मध्यराति एक महिलाको शव बोकेर ल्याई सडकमा फालेको आरोपमा एक युवक पक्राउ परेका छन् । काठमाडौं कालिमाटी सडकमा गत शुक्रबार बिहान एक महिलाको शव फेला परेको थियो। घटनाबारे प्रहरी वृत्त कालिमाटी र काठमाडौं उपत्यका अपराध अनुसन्धान कार्यालयको टोली खटिएर अनुसन्धान अघि बढायो ।
अनुसन्धानका क्रममा एक युवकले शव बोकेर ल्याएको देखियो । प्रहरीले त्यसपछि बझाङ घर भएका कविन्द्र मल्ललाई पक्राउ गरेको छ । उनी लागुऔषध सेवनकर्ता भएको पाइएको छ । उनले कालिमाटीको फुटपाथबाट ती महिलालई बोकेर शुक्रबार राति करिब ३ बजेतिर सडकमा फालेको अनुसन्धानमा संलग्न एक प्रहरीले जानकारी दिए ।
‘उनले ६०–७० मिटर जति बोकेर लगेको देखिन्छ । सिसिटिभी फुटेजमा देखिएको मान्छे म नै हुँ भनेका छन् । तर आफूले के गरेको के घटना भएको हो भन्ने थाहा छैन भनेका छन्,’ ती प्रहरीले सुनाए । मृतक महिलाको पनि सनाखत भएको छ । मृतक महिला उदयपुरकी जानुका सुवेदी भएको खुलेको छ ।
महिला पनि फुटपाथमै बस्ने गरेको पाइएको प्रहरीले जानकारी दिएको छ । उनको शरीरमा कुनै चोट भने नदेखिएको प्रहरीले बताएको छ । उनको हत्या भएको हो वा आफै मृत्यु भएपछि बोकेर त्यहाँ पुर्याएको हो भन्ने अनुसन्धानकै क्रममा रहेको प्रहरीले बताएको छ । पोष्टमर्टमपछि घटनाबारे थप कुरा खुल्ने प्रहरीको भनाइ छ।
