देउवा निवासमा कर्मचारी युनियनको घेराउ

---

नयाँ पेज

०५:०८ बजे

काठमाडौं । नेपाली कांग्रेस निकट कर्मचारी युनियनका पदाधिकारीहरु पार्टी सभापति शेरबहादुर देउवा निवास पुगेका छन् । निजामती विधेयकमा सुधार र संशोधनको माग राख्दै उनीहरु देउवा निवास बुढानिलकण्ठ पुगेका हुन् ।

विधेयकका केही प्रावधानमा असहमति जनाउँदै आएको यु्नियनले आफ्नो सुझाव सभापति देउवालाई बुझाएको छ । मंगलबारको प्रतिनिधिसभा बैठकमा संघीय निजामती सेवा विधेयक पेश गर्ने कार्यसूची छ । युनियनले विधेयकमा सुधार गर्नुपर्ने विभिन्न मागबारे पार्टी नेतृत्वको ध्यानाकर्षण गराएको हो । युनियनका नेताहरुसँग सभापति देउवाले निजामती कर्मचारीले उठाएका सरोकारका विषयमा राज्य व्यवस्था समितिका सभापति रामहरी खतिवडालाई बोलाएर आफूले निर्देशन दिने बताएका थिए ।

यी हुन् युनियनका एजेण्डाहरु
– अतिरिक्त सचिवको कार्यकाल तोक्नु पर्ने ।
– ५८ वर्षबाट ६० वर्ष बनाउँदा क्रमश ६ महिना एक वर्ष र दुई वर्ष गरेर गर्नुपर्ने ।
– एक पटकलाई अन्तर प्रदेश सरुवा खुला गरी आगामी दिनमा सोलाई व्यवस्थित गर्न प्रत्येक प्रदेशले जनसंख्याको आधारमा आफ्नो आवश्यकता अनुसार समावेशी कोटा निर्धारण गर्नुपर्ने ।
– १२ वर्ष सेवा अवधि पुगेका कर्मचारीहरूको एक श्रेणी बढुवा गर्नुपर्ने ।
– उपसचिव तथा सहसचिवको परीक्षा दिँदा साविककै पाँच वर्षे सेवा अवधि लागू गर्नुपर्ने ।
– निजामती कर्मचारीको परिभाषा अन्तर्गत संघ प्रदेश र स्थानीय तहका कर्मचारीलाई पनि समेटी एक आपसमा अन्तरसम्बन्ध कायम गर्नुपर्ने ।