.gif)
 (1).png){kind=logo}
.png)
१२६ गोल र २०७ खेल : फुटबलबाट मेस्सीको भावुक बिदाइ
काठमाडौं : विश्व फुटबलका महान् खेलाडी लियोनेल मेस्सीले अर्जेन्टिनाको राष्ट्रिय टोलीबाट आफ्नो अन्तर्राष्ट्रिय खेल जीवनमा पूर्णविराम लगाएका छन्।
आफ्नो अन्तिम अन्तर्राष्ट्रिय खेलमा बेनिनविरुद्ध अर्जेन्टिनालाई ३–० को जित दिलाउँदै मेस्सीले राष्ट्रिय टोलीबाट बिदा लिएका हुन्।
ब्युनर्स आयर्समा ८५ हजारभन्दा बढी दर्शकले भरिएको रंगशालामा भएको खेलमा अर्जेन्टिनाका लागि निकोलास ओटामेन्डी, निकोलास पाज मार्टिनेज र मेस्सीले गोल गरे।
ओटामेन्डी र पाजले मेस्सीले सिर्जना गरेको अवसरलाई सदुपयोग गरेका थिए भने मेस्सीले पेनाल्टीमार्फत गोल गर्दै आफ्नो अन्तिम अन्तर्राष्ट्रिय खेललाई स्मरणीय बनाए।
यससँगै मेस्सीले अर्जेन्टिनाका लागि २०७ अन्तर्राष्ट्रिय खेलमा १२६ गोल गर्दै राष्ट्रिय टोलीको यात्रा टुंग्याएका छन्। क्लब फुटबलमा भने उनले आफ्नो खेललाई निरन्तरता दिनेछन्।
युवा टोलीदेखि विश्व फुटबलको शिखरसम्म
सन् २००४ मा अर्जेन्टिनाको युवा टोलीबाट मेस्सीले राष्ट्रिय जर्सी लगाउन सुरु गरेका थिए। सन् २००५ मा दक्षिण अमेरिकी युथ च्याम्पियनसिपमा अर्जेन्टिना तेस्रो हुँदा उनी टोलीका सदस्य थिए।
त्यही वर्ष अर्जेन्टिनाले फिफा युथ च्याम्पियनसिप जित्दा मेस्सी टोलीका महत्वपूर्ण सदस्य बने र गोल्डेन बलसमेत जिते।
सन् २००५ मै सिनियर राष्ट्रिय टोलीमा प्रवेश गरेका उनले २००६ मा क्रोएसियाविरुद्ध पहिलो अन्तर्राष्ट्रिय गोल गरे।
सोही वर्षको विश्वकपमा सर्बिया एन्ड मोन्टेनेग्रोविरुद्ध गोल गर्दै उनले विश्वकपमा आफ्नो गोलको खाता खोलेका थिए।
सन् २००८ मा मेस्सीको नेतृत्वमा अर्जेन्टिनाले ओलम्पिक स्वर्ण पदक जित्यो। त्यसपछि उनी अर्जेन्टिनाको राष्ट्रिय टोलीका प्रमुख खेलाडीका रूपमा स्थापित भए।
सन् २०१४ को विश्वकपमा मेस्सीको नेतृत्वमा अर्जेन्टिना फाइनल पुगे पनि जर्मनीसँग पराजित भयो। उक्त प्रतियोगितामा उनले गोल्डेन बल पाए।
त्यसको एक वर्षपछि कोपा अमेरिकाको फाइनलमा चिलीसँग पराजित भएपछि पनि उनको उपाधि यात्राले निरन्तरता पाउन सकेन।
लगातार तीन ठूला प्रतियोगिताको फाइनलमा पराजित भएपछि निराश भएर उनले अन्तर्राष्ट्रिय फुटबलबाट सन्न्यास घोषणा गरे। तर व्यापक दबाबपछि सन् २०१८ मा राष्ट्रिय टोलीमा फर्किए।
त्यस वर्षको विश्वकपमा अर्जेन्टिना अन्तिम १६ मा फ्रान्ससँग पराजित भयो।
२८ वर्षको प्रतीक्षा अन्त्य गर्दै विश्वकपसम्म
मेस्सीको अन्तर्राष्ट्रिय करियरको सबैभन्दा महत्वपूर्ण मोड सन् २०२१ मा आयो। अर्जेन्टिनाले २८ वर्ष लामो उपाधिविहीन यात्राको अन्त्य गर्दै कोपा अमेरिका जित्दा मेस्सीले पहिलो ठूलो सिनियर अन्तर्राष्ट्रिय उपाधि हात पारे।
त्यसको एक वर्षपछि अर्जेन्टिनाले फ्रान्सलाई टाइब्रेकरमा पराजित गर्दै सन् २०२२ को विश्वकप उपाधि जित्यो। उक्त विश्वकपमा सात गोल गरेका मेस्सीले गोल्डेन बल जिते।
सन् २०२३ मा उनले अन्तर्राष्ट्रिय फुटबलमा १०० गोलको आँकडा पार गरे। सन् २०२४ मा अर्जेन्टिनाले कोपा अमेरिका उपाधि रक्षा गर्न सफल भयो।
मेस्सीले विश्वकपमा सर्वाधिक गोल गर्ने कीर्तिमानतर्फ पनि आफ्नो नाम अघि सारे। उनले मिरोस्लाभ क्लोजको कीर्तिमान तोडे पनि फ्रान्सका केलियन एम्बाप्पेले पछि उनलाई उछिने।
मेस्सीको नेतृत्वमा अर्जेन्टिना लगातार दोस्रो पटक विश्वकप फाइनलमा पुगेको थियो। तर स्पेनसँग १–० ले पराजित भएपछि अर्जेन्टिना उपाधिबाट विमुख भयो।
आठ पटकका बालोन डी’ओर विजेता मेस्सीले राष्ट्रिय टोलीबाट बिदा लिँदा आफ्नो अन्तर्राष्ट्रिय करियरमा २०७ खेल र १२६ गोलको कीर्तिमान छाडेका छन्।
