.gif)
.png)
दिल्लीबाट काठमाडौं आएको भिस्ताराको जहाजमा बम राखेको हल्ला, सुरक्षा जाँच गरिंदै
काठमाडौं । भारतको राजधानी नयाँदिल्लीबाट काठमाडौं आएको भिस्तारा एयरलाइन्सको जहाजमा बम रहेको हल्ला आएपछि विमानस्थलले आवश्यक सुरक्षा सतर्कता अपनाएको छ । मंगलबार दिउँसो काठमाडौंस्थित त्रिभुवन अन्तरर्राष्ट्रिय विमानस्थलमा अवतरण भएको भिस्तारा एयरलाइन्सको युके १५५ उडान नम्बरको जहाजमा बम रहेको सूचना प्राप्त भएपछि आवश्यक सतर्कता अपनाइएको विमानस्थल स्रोतले जनाएको छ ।
जहाजमा बम राखेको फोन दिल्लीबाटै आएको विमानस्थल स्रोतले जनाएको छ । बम राखेको खबर पाइएपछि नेपाली सेनाको कमाण्डमा सुरक्षा निकायले जहाजको खानतलासी थालेको छ । यद्दपि विमानस्थलबाट हुने जहाजहरुको उडान र अवतरण भने रोकिएको छैन ।
अहिले प्रहरीले भिस्तारा एयरलाइन्सबाट आएका यात्रुहरूको सुरक्षा जाँच गरिरहेको छ । यात्रु र विमानको आवश्यक सुरक्षा जाँच गरेपछि मात्रै वास्तविकता थाहा हुने विमानस्थल स्रोतले बताएको छ । उक्त जहाज मंगलबार दिउँसो ४ः३० बजे अवतरण भएको हो । पछिल्लो समयमा भारतीय विमान सेवामा बम राखिएको धम्की बारम्बार आइरहेका छन् । सबैजसो विमान कम्पनीले बम भएको धम्की खेप्दै आएका छन् ।
केही दिनअघि अमेरिकाको सिकागो जाँदै गरेको एयर इन्डियाको उडान क्यानडाको एउटा विमानस्थलमा बमको धम्कीपछि डाइभर्ट गरिएको थियो । दिल्लीबाट उडेको विमानलाई अनलाइन बमको धम्की प्राप्त भएपछि क्यानाडातर्फ डाइभर्ट गरिएको हो । उक्त विमान क्यानाडाको इक्लुइट विमानस्थलमा अवतरण गराइएको एजेन्सीहरूले उल्लेख गरेका छन् । यस्तै मुम्बईबाट न्युयोर्कका लागि उडेको एयर इन्डियाको विमानलाई बमको धम्कीपछि दिल्लीतर्फ डाइभर्ट गरिएको थियो । तर, चेकजाँचका क्रममा कुनै शंकास्पद वस्तु भेटिएको थिएन ।
