.gif)
 (1).png){kind=logo}
.png)
जुट्दै राजावादी : कमल थापा र राजेन्द्र लिङदेन आज एकै मञ्चमा
काठमाडौं । लामो समयपछि राप्रपा अध्यक्ष राजेन्द्र लिङदेन र राप्रपा नेपालका अध्यक्ष कमल थापा एउटै मञ्चमा देखिने भएका छन् । थापाको निम्तो मान्दै लिङ्देन आज राप्रपा नेपालको विरोधसभामा सहभागी भएका छन्। एउटै लक्ष्य र गन्तव्य बोकेर हिंडिरहे पनि राजावादी हस्ती नेताहरू एक ठाउँमा उभिन सकिरहेका थिएनन् । लिङदेन र थापाबीच त झन पानी बाराबारकै अवस्था थियो । राप्रपालाई नै फुटाएर थापाले राप्रपा नेपाल गठन गरेको हुँदा यी दुई पार्टीबीच तिक्तता कायम थियो । राजावादी दुई प्रमुख शक्ति नै मिल्न नसक्दा समग्र राजसंस्था पक्षधरहरुको एकता गाँठो परिरहेको थियो ।
राप्रपा प्रवक्ता मोहन श्रेष्ठले राप्रपा नेपालको कार्यक्रममा अध्यक्ष लिङदेन उपस्थित हुने पुष्टि गरे । ‘राजसंस्थाको पक्षमा हुने कुनै पनि आन्दोलन र अभियानलाई साथ समर्थन दिने हाम्रो पार्टीको घोषित नीति नै हो । आज राप्रपा नेपालबाट अध्यक्षज्यूलाई निम्ता आएको छ र उहाँ सहभागी हुनुहुन्छ,’ श्रेष्ठले भने । आज राप्रपा कमल थापाको निम्तोमा लिङ्देनसहित संयुक्त जनआन्दोलन समितिका संयोजक नवराज सुबेदी र राष्ट्रिय शक्ति नेपालका अध्यक्ष केशरबहादुर बिष्ट समेत कार्यक्रममा उपस्थित हुने छन् । राप्रपा नेपालका अध्यक्ष थापाले आफूहरु चारजना पहिलो पटक एउटै मञ्चमा देखिन लागेको भन्दै फेसबुकमा पोस्ट गरेका छन्।
अहिलेका प्रमुख चार हस्ती नेताहरु एक ठाउँमा उभिने भएपछि राजावादी पंतिमा उत्साह देखिएको छ । आजको कार्यक्रमले सबै राजसंस्था पक्षधर शक्ति एकजुट भएको सन्देश दिन चाहेका छन् । अध्यक्ष लिङ्देनको सहभागिता निश्चित रहे पनि राप्रपाले औपचारिकरुपमा राप्रपा नेपालको कार्यक्रमलाई सघाउने बारे कुनै निर्णय गरेको छैन । प्रवक्ता श्रेष्ठ हरेकपटक विज्ञप्ति निकालेर समर्थन गरिरहनु नपर्ने बताउँछन् ।
उनले भने, ‘हामीले पहिल्यै भनिसकेको भएर विज्ञप्ति निकालिएन । राप्रपा नेपालको कार्यक्रमलाई पनि राप्रपाको नैतिक समर्थन रहन्छ ।’ आजको कार्यक्रममा राप्रपा नेपालले पार्टीको झण्डा प्रयोग नगर्ने भएको छ । सबै राजावादी शक्तिहरुलाई समेट्ने हेतुले राष्ट्रिय झण्डा मात्रै बोक्ने रणनीति बनाइएको हो ।
राप्रपा नेपालका प्रवक्ता राजाराम बर्तौलाको अनुसार आजको सभा करिब डेढ घण्टाको हुनेछ । चार जना प्रमुख वक्तासहित अरु दुई–तीन जना थपिन सक्ने उनले जानकारी दिएका छन् । बर्तौलाका अनुसार दुर्गा प्रसाईंको नागरिक बचाउ महाअभियान, शिवसेना नेपाल र वीपी कांग्रेसलाई पनि निम्ताइएको छ । उनीहरुबाट पनि एक एक जनाले भाषण गर्न सक्ने छन् । कार्यक्रमस्थल भने अन्तिम समयमा परिवर्तन गरियो। यसअघि भृकुटी मण्डपमा गर्ने भनिएकोमा रत्नपार्कमा हुने भएको छ ।
