श्रीलङ्कामा पूर्वमन्त्रीका छोरा घुस प्रकरणमा पक्राउ

लागुऔषध तस्करलाई छुटाउन करोडौंको मोलमोलाइ

---

नयाँ पेज

२०८३ असार ११ बिहीबार २१:४१ बजे

कोलम्बो: श्रीलङ्कामा पूर्व न्यायमन्त्री विजयदास राजपक्षेका छोरा रकिथा राजपक्षे पक्राउ परेका छन्। एक चर्चित लागुऔषध तस्करलाई रिहा गराउन ठूलो रकम घुस लिएको आरोपमा श्रीलङ्काको प्रमुख भ्रष्टाचार अनुसन्धान निकायले बिहीबार उनलाई हिरासतमा लिएको हो।

 रकिथा राजपक्षेले सन् २०२३ मा मेडागास्करबाट इन्टरपोलको सहयोगमा पक्राउ परी स्वदेश फिर्ता ल्याइएका कुख्यात लागुऔषध तस्कर नादुन चिन्ताका (जो 'हरक काटा' नामले परिचित छन्) लाई रिहा गराउन मध्यस्थता गरेका थिए। उक्त रिहाइका लागि करिब ५० करोड श्रीलङ्काली रुपैयाँ घुस मागिएको र त्यसमध्ये १२ करोड रुपैयाँ रकिथाले लिइसकेको भ्रष्टाचार अनुसन्धान आयोगले जनाएको छ।

घटनाका बेला उनका पिता विजयदास राजपक्षे न्याय तथा कारागार सुधार मन्त्री थिए। यद्यपि, सन् २०२४ को आम निर्वाचनमा तत्कालीन सरकारको पराजयपछि उक्त रिहाइको योजना सफल हुन सकेको थिएन।

 गत सेप्टेम्बरमा राष्ट्रपति अनुरा कुमार दिसानायके सत्तामा आएपछि श्रीलङ्कामा भ्रष्टाचारविरुद्धको अभियान तीव्र पारिएको छ। सोही अभियानको एक कडीका रूपमा उच्च राजनीतिक पहुँच भएका रकिथा राजपक्षेको गिरफ्तारीलाई हेरिएको छ। अधिकारीहरूले पक्राउ परेका रकिथाको परिवार सन् २००५ देखि २०२२ सम्म देशको राजनीतिमा हाबी रहेको राजापाक्ष वंशसँग सम्बन्धित नरहेको स्पष्ट पारेका छन्।

अहिले कुख्यात तस्कर 'हरक काटा' न्यायिक हिरासतमा छन्। उनीमाथि आपराधिक सञ्जाल सञ्चालन गरेको गम्भीर आरोप छ। रकिथाको गिरफ्तारीसँगै श्रीलङ्काको राजनीतिमा प्रभाव राख्ने व्यक्तिहरूमाथि नयाँ सरकारको कारबाहीले तीव्रता पाएको छ।