कसले जित्दैछ विश्वकप ?

---

नयाँ पेज

२०८३ श्रावण ३ आइतबार १८:४९ बजे

काठमाडाैं :  तथ्याङ्क प्रदायक संस्था 'ओप्टा'ले स्पेनलाई सन् २०२६ को विश्वकप जित्ने बलियो दाबेदारका रूपमा प्रक्षेपण गरेको छ, जसमा स्पेनले न्यु जर्सीमा उपाधि उचाल्ने सम्भावना ५९.५६ प्रतिशत रहेको छ। धेरै पूर्व खेलाडी र पण्डितहरूले पनि 'ला रोजा' (स्पेन)लाई नै विजेताको रूपमा रोजेका छन्।

इङ्ल्यान्डका पूर्व स्ट्राइकर माइकल ओवेनले विश्व वरियताको दोस्रो स्थानमा रहेको स्पेन प्रतियोगिताको 'पात्र' विजेता भएको बताए।

'स्पेनसँग व्यक्तिगत रूपमा सबैभन्दा उत्कृष्ट खेलाडीहरू छैनन्, मलाई लाग्छ फ्रान्ससँग सायद छन्... तर स्पेन एक टोलीको रूपमा इङ्ल्यान्ड जे होइन, त्यो सबै हो, उनीहरू बहादुर छन् र बलसँगै खेल्न साहसी छन्,'  ओवेनले 'द स्ट्रेट्स टाइम्स'सँग भने, 'स्पेन एउटा उत्कृष्ट टोली हो जसले आत्मविश्वासका साथ बल पास गर्छ र सामूहिक रूपमा अद्भुत फुटबल खेल्छ।' 

पूर्व बार्सिलोना र म्यानचेस्टर युनाइटेडका स्ट्राइकर ज्लातान इब्राहिमोविच, जसले स्वीडेनका लागि दुईवटा विश्वकप खेलेका थिए, उनले स्पेनले फाइनलमा दबदबा कायम राख्ने अपेक्षा गरेका छन्। यो फाइनल उनीहरूको युरो २०२४ को विजयको दुई वर्षपछि हुँदैछ।

अमेरिकी ब्रोडकास्टर 'फक्स स्पोर्ट्स'का पण्डित ज्लातानले भने, 'स्पेनले फ्रान्सलाई सेमिफाइनलमा धेरै राम्रोसँग सम्हाल्यो। मलाई विश्वास छ कि उनीहरूले यो अर्जेन्टिनालाई पनि सम्हाल्न सक्छन्। अर्जेन्टिना काउन्टर-अट्याक गर्ने टोली होइन। स्पेनले आफ्नो काम गर्नेछ। उनीहरू सामूहिक रूपमा खेल्नेछन्... मलाई विश्वास छ स्पेनले त्यो खेलमा दबदबा कायम राख्नेछ।' 

स्पेन जोन टेरीको पनि विजयको लागि रोजाइमा थियो। इङ्ल्यान्डका पूर्व कप्तानले 'स्पोर्ट्स अनसेन्सर्ड' शोमा लुइस डे ला फुएन्तेको टोलीसँग 'अर्जेन्टिनाका लागि धेरै ठूलो चुनौती रहेको' बताए।

सन् २०१० मा स्पेनको पहिलो विश्वकप विजयका बेला कप्तान रहेका पूर्व गोलकिपर इकर कासिलासले टोलीले दोस्रो पटक उपाधि घर ल्याउने क्षमतामाथि विश्वास व्यक्त गर्दै आफ्नो जर्सीको ब्याजमा अर्को तारा टाँसिएको तस्बिर साझा गरेका छन्।

धेरैजसोको सहमति स्पेनको जिततर्फ केन्द्रित रहे पनि, केहीले अर्जेन्टिनाको सम्भावना न्यून भए पनि अझै बाँकी रहेको ठान्छन्।

इङ्ल्यान्डका महान् स्ट्राइकरमध्येका एक एलन शियररले 'द रेस्ट इज फुटबल' पोडकास्टमा साविक विजेतालाई समर्थन गर्दै भने, 'यदि स्पेनलाई रोक्न सक्ने कुनै एक टोली छ भने, त्यो अर्जेन्टिना हो, उनीहरूको मानसिकता र एकताका कारण। उनीहरू धेरै पटक दबाबमा परेका छन् र अप्ठ्यारोमा थिए, तर कसरी हो जित निकाल्न सफल भए। तपाईंले उनीहरूको यही कुराको प्रशंसा गर्नुपर्छ।' 

उनले मेस्सीलाई लक्षित गर्दै थपे, "जब तपाईंको टोलीमा एक प्रतिभा हुन्छ, तपाईंको सधैं मौका हुन्छ।"

तर अर्जेन्टिनाले बलियो टोली स्पेनलाई उपाधि भिडन्तमा कसरी हराउन सक्छ? इङ्ल्यान्डका फुटबल पण्डित मिका रिचार्ड्सको विचारमा यसको जवाफ 'लो-ब्लक ट्रान्जिसन' हो—अर्थात्, टोलीले आफ्नो गोलपोस्टको नजिक बसेर रक्षात्मक खेल्ने र बल खोसेपछि तुरुन्तै आक्रामक काउन्टर-अट्याकमा जाने रणनीति।

उनले थपे, 'मेस्सीलाई बल दिनुहोस्, जबकि [जुलियन] अल्भारेज वा लिसान्द्रो]मार्टिनेजले खेललाई कडा बनाउन सक्छन्, ठीक त्यसरी नै जसरी उनीहरूले इङ्ल्यान्डविरुद्ध गरेका थिए। मलाई लाग्छ अर्जेन्टिनाले इङ्ल्यान्डविरुद्ध जस्तै खेलमा टिकिरहनुपर्छ र खेलको गति (मोमेन्टम) बदलिँदा आक्रमण गर्नुपर्छ।'

यसैबीच, इङ्ल्यान्डका अर्का महान् खेलाडी ग्यारी लिनेकरले आफ्नो पूर्व-प्रतियोगिता रोजाइ स्पेनमै अडिग रहे, तर अर्जेन्टिना 'धेरै जुझारु'  भएको भन्दै भविष्यवाणी गर्न निकै कठिन भएको बताए। उनले भने, 'तपाईं ती 'स-साना' खेलाडी [मेस्सी]को विरुद्धमा जान सक्नुहुन्न। उनी यति महान् छन्; यो खेल निकै, निकै प्रतिस्पर्धात्मक हुनेछ। यो साँच्चै ५०-५० को स्थिति छ।' 

अरूभन्दा फरक, न्युयोर्क सिटीका मेयर जोहरन मामदानीले कुनै एक पक्ष रोज्न अस्वीकार गरे। हाँस्दै उनले भने, 'मैले समर्थन गरेका सबै हारेका छन्। त्यसैले मलाई लाग्छ कि मैले जसको नाम लिन्छु, उसैले हार्छ। म एउटा 'क्लासिक राजनीतिज्ञ'को उत्तर दिन्छु—म एउटा राम्रो खेल हेर्नका लागि उत्साहित छु।'