.gif)
 (1).png){kind=logo}
.png)
काठमाडौं आइपुगे भारतीय सेना प्रमुख
काठमाडौं : भारतीय सेनाका प्रमुख धिरज सेठ चारदिने नेपाल भ्रमणका क्रममा आइतबार काठमाडौं आइपुगेका छन् । नेपाली सेनाका प्रधानसेनापति अशोकराज सिग्देलको औपचारिक निमन्त्रणामा भारतीय सेना प्रमुख सेठ नेपाल आएका हुन् । उनको भ्रमणलाई नेपाल–भारतबीचको लामो समयदेखिको सैन्य सम्बन्धलाई थप सुदृढ बनाउने महत्वपूर्ण अवसरका रूपमा लिइएको छ ।
भारतीय सेना प्रमुख सेठको नेपाल भ्रमणका क्रममा मुख्यतः दुईवटा महत्वपूर्ण कार्यक्रम हुने नेपाली सेनाले जनाएको छ । नेपाली सेनाका प्रवक्ता सहायक रथी राजाराम बस्नेतका अनुसार भ्रमणको पहिलो उद्देश्य भारतीय सेना प्रमुख सेठलाई नेपाली सेनाको मानार्थ महारथीको दर्ज्यानी चिह्न प्रदान गर्नु हो भने दोस्रो उद्देश्य नेपाल र भारतबीचको सैन्य सम्बन्धलाई थप प्रगाढ बनाउनु हो ।
नेपाल र भारतबीचको परम्परागत सैन्य सम्बन्धअनुसार दुवै देशका सेना प्रमुखलाई एकअर्काको देशमा मानार्थ महारथीको दर्जा प्रदान गर्ने प्रचलन रहँदै आएको छ । सोही परम्पराअनुसार भारतीय सेना प्रमुख सेठलाई पनि नेपाली सेनाको मानार्थ महारथीको दर्ज्यानी चिह्न प्रदान गर्न लागिएको हो ।
सोमबार राष्ट्रपति कार्यालय शीतल निवासमा विशेष समारोह आयोजना गरी राष्ट्रपति रामचन्द्र पौडेलले भारतीय सेना प्रमुख सेठलाई नेपाली सेनाको मानार्थ महारथीको दर्ज्यानी चिह्न प्रदान गर्ने कार्यक्रम रहेको सैनिक प्रवक्ता बस्नेतले जानकारी दिएका छन् । उक्त समारोहमा नेपाली सेना तथा नेपाल सरकारका उच्च अधिकारीहरूको समेत उपस्थिति रहनेछ ।
मानार्थ महारथीको दर्ज्यानी चिह्न ग्रहण गरेपछि भारतीय सेना प्रमुख सेठले नेपाली सेनासँगको सम्बन्धलाई थप बलियो बनाउने विषयमा उच्चस्तरीय भेटवार्ता गर्नेछन् । सोमबार नै नेपाली सेनाको मुख्यालय जंगी अड्डामा प्रधानसेनापति अशोकराज सिग्देल र भारतीय सेना प्रमुख सेठबीच द्विपक्षीय भेटवार्ता हुने कार्यक्रम छ ।
द्विपक्षीय भेटवार्तामा नेपाल–भारतबीचको सैन्य सहकार्य, दुई देशका सेनाबीचको पारस्परिक सम्बन्ध तथा आगामी दिनमा सहकार्यलाई थप प्रभावकारी बनाउने विषयमा छलफल हुने अपेक्षा गरिएको छ । नेपाल र भारतका सेनाबीच संयुक्त सैन्य अभ्यास, तालिम, विपद् व्यवस्थापन तथा विभिन्न तहमा सैनिक आदानप्रदान हुँदै आएको छ ।
भारतीय सेना प्रमुख सेठको नेपाल भ्रमणका क्रममा नेपाली सेनाका उच्च अधिकारीहरूसँग पनि भेटघाट तथा छलफल हुने कार्यक्रम रहेको छ । भ्रमणले दुई देशका सेनाबीच कायम रहेको आपसी विश्वास, सहकार्य र संस्थागत सम्बन्धलाई थप मजबुत बनाउन योगदान पुग्ने नेपाली सेनाको विश्वास छ ।
भारतीय सेना प्रमुख सेठ आइतबार काठमाडौं आएपछि उनको चारदिने नेपाल भ्रमण औपचारिक रूपमा सुरु भएको हो । भ्रमणका निर्धारित कार्यक्रम सम्पन्न गरी उनी बुधबार भारत फर्किने कार्यक्रम रहेको नेपाली सेनाले जनाएको छ ।
