.gif)
 (1).png){kind=logo}
.png)
सामाजिक सञ्जालबाट उदाएका शक्ति टिक्दैनन्: वर्षमान पुन
काठमाडौँ : नेकपा (माओवादी केन्द्र) का नेता एवं सांसद वर्षमान पुनले सामाजिक सञ्जाल र डिजिटल प्लेटफर्मको लहरबाट उदाएका राजनीतिक शक्तिहरू दीर्घकालीन रूपमा टिकाउ नहुने बताएका छन्। शनिबार काठमाडौँमा आयोजित एक कार्यक्रमलाई सम्बोधन गर्दै उनले डिजिटल माध्यमको चर्चाका भरमा आएका त्यस्ता शक्तिहरू छिट्टै ओरालो लाग्ने प्रवृत्ति राष्ट्रिय तथा अन्तर्राष्ट्रिय रूपमै देखिएको दाबी गरे।
पछिल्लो समय विकसित भइरहेको राजनीतिक प्रवृत्तिको गम्भीर विश्लेषण गर्दै नेता पुनले सामाजिक सञ्जालको क्षणिक प्रभावबाट उदाएका राजनीतिक समूहहरूमा स्पष्ट विचार, ठोस सिद्धान्त र दीर्घकालीन नेतृत्वको तीव्र अभाव देखिने टिप्पणी गरे। डिजिटल माध्यमको प्रयोग गरेर तीव्र रूपमा उदाउने राजनीतिक शक्तिहरूले प्रारम्भिक चरणमा केही प्रभाव र आकर्षण देखाए पनि उनीहरूसँग बलियो संरचनागत सङ्गठन र वैचारिक आधार नहुने उनको तर्क छ। वैचारिक धरातल कमजोर भएकै कारण त्यस्ता शक्तिहरू दिगो हुन नसक्ने अवस्था रहने उनले प्रस्ट पारे।
सम्बोधनका क्रममा नेता पुनले अहिलेको डिजिटल युगमा राजनीतिक एजेन्डाहरू सामाजिक सञ्जाल र डिजिटल प्लेटफर्ममार्फत नै तय हुने प्रवृत्ति रैथाने बन्दै गएकोप्रति चासो व्यक्त गरे। उनले यस्तो भर्चुअल एजेन्डा निर्माण प्रक्रियामा कुनै निश्चित, जबाफदेही वा स्पष्ट नेतृत्व नहुने अवस्था देखिएको भन्दै चिन्ता प्रकट गरे। यस्ता सतही प्रवृत्तिहरूलाई गहिरो अध्ययन गरेर मात्र राजनीतिक स्थायित्व कायम गर्न र पार्टी सङ्गठनलाई भुइँतहसम्म सुदृढ बनाउन सकिने धारणा समेत उनले व्यक्त गरे।
