.gif)
 (1).png){kind=logo}
.png)
दानबहादुर कार्कीको रिटमा कात्तिक ३० गते सुनुवाइ
काठमाडौं : निवर्तमान प्रहरी महानिरीक्षक (आईजीपी) दानबहादुर कार्कीले आफूलाई पदबाट हटाउने सरकारको निर्णयविरुद्ध दायर गरेको रिटमा कात्तिक ३० गतेका लागि पेसी तोकिएको छ ।
आफूलाई गैरकानुनी रूपमा प्रहरी महानिरीक्षक पदबाट हटाइएको दाबीसहित कार्कीले सर्वोच्च अदालतमा रिट निवेदन दिएका थिए । बिहीबार कानुन व्यवसायीमार्फत पेस गरिएको उक्त निवेदन शुक्रबार दर्ता भएको हो ।
सर्वोच्च अदालत प्रशासनका अनुसार रिटमाथि सुनुवाइका लागि कात्तिक ३० गते पेसी तोकिएको छ । बिहीबार निवेदन पेस भए पनि अध्ययनका क्रममा रहेकाले तत्काल दर्ता हुन नसकेको सर्वोच्च प्रशासनले जनाएको थियो ।
सरकारले कार्कीलाई प्रहरी महानिरीक्षक पदबाट हटाएर प्रधानमन्त्रीको सुरक्षा सल्लाहकारको जिम्मेवारी दिएको छ । तर, कार्कीले मन्त्रिपरिषद्को उक्त निर्णयसम्बन्धी पत्र बुझेका छैनन् ।
अब सर्वोच्च अदालतमा हुने सुनुवाइबाट सरकारको निर्णयको कानुनी वैधता र कार्कीको मागबारे न्यायिक परीक्षण अघि बढ्नेछ ।
