मेलम्ची खोलामा फस्यो मन्त्रीको गाडी

---

नयाँ पेज

१८:५८ बजे

काठमाडौं । भूमि व्यवस्था, सहकारी तथा गरिबी निवारण मन्त्री बलराम अधिकारी सवार गाडी सिन्धुपाल्चोकको मेलम्ची खोलामा फसेको छ। आज (शनिबार) दिउँसो हेलम्बु गाउँपालिकाको शेरास्थित रातो पुलमा खोला तर्ने क्रममा मन्त्रीको गाडी फसेको जिल्ला प्रहरी कार्यालय सिन्धुपाल्चोकले जनाएको छ।

प्रहरीका अनुसार मन्त्री अधिकारी एक कार्यक्रममा सहभागी हुन जाने क्रममा गाडी खोलामा फसेको हो। गाडी खोलाको बीचमा केही समय फसे पनि तत्कालै प्रहरी र स्थानीयको सहयोगमा सुरक्षित रूपमा बाहिर निकालिएको थियो । जिल्ला प्रहरी कार्यालय सिन्धुपाल्चोकले गाडी पूर्ण रूपमा सुरक्षित रहेको र मन्त्री अधिकारीलाई कुनै क्षति नपुगेको पुष्टि गरेको छ।

‘मन्त्री ज्यूको गाडी खोलामा फसेको खबर प्राप्त भए लगत्तै हामीले उद्धार कार्य सुरु गर्‍यौं। अहिले गाडी निकालिएको छ र स्थिति सामान्य छ’, जिल्ला प्रहरी कार्यालयका एक अधिकारीले बताए। यो घटनाले मेलम्ची क्षेत्रको बाढी र खोलाको जोखिमप्रति स्थानीयको ध्यानाकर्षण भएको छ। मन्त्री अधिकारीले उद्धारमा सहयोग गर्ने प्रहरी र स्थानीयलाई धन्यवाद व्यक्त गरेका छन्।