.gif)
 (1).png){kind=logo}
.png)
मेटामा एआईले लियो ठाउँ, हजारौं कर्मचारीले गुमाए काम
मेटाका सीईओ जकरबर्गको आश्वासन: यस वर्ष अब थप कर्मचारी कटौती हुने छैन
काठमाडौँः फेसबुकको मातृ कम्पनी 'मेटा' ले आफ्ना १० प्रतिशत कर्मचारीलाई जागिरबाट निकालेकै दिन अब यस वर्ष थप कर्मचारी कटौती नहुने घोषणा गरेको छ। बुधबार कम्पनीका प्रमुख कार्यकारी अधिकृत (सीईओ) मार्क जकरबर्गले आन्तरिक कूटनीतिक पत्र (मेमो) मार्फत कर्मचारीहरूलाई यस्तो आश्वासन दिएका हुन्। रोयटर्सले प्राप्त गरेको उक्त मेमोका अनुसार मेटाले आर्टिफिसियल इन्टेलिजेन्स (एआई) प्रविधिलाई प्राथमिकता दिँदै कम्पनीमा ठूलो संरचनात्मक परिवर्तन गरिरहेको छ।
बुधबार नै मेटाले विश्वभर रहेका आफ्ना कुल कर्मचारीमध्ये १० प्रतिशतलाई विदा गरेको छ भने अन्य ७ हजार कर्मचारीलाई एआई वर्कफ्लो सँग सम्बन्धित नयाँ जिम्मेवारीमा स्थानान्तरण गरेको छ। यसरी यसै साता भएको कटौती र सरुवाबाट कम्पनीका कुल २० प्रतिशत कर्मचारी प्रत्यक्ष प्रभावित भएका छन्। केही कर्मचारीको सरुवा भइसकेको छ भने बाँकीलाई बुधबार नै जानकारी गराइएको छ।
आफ्ना कर्मचारीहरूलाई आश्वस्त पार्न खोज्दै सीईओ जकरबर्गले मेमोमा लेखेका छन्, 'म यो प्रष्ट पार्न चाहन्छु कि यस वर्ष कम्पनीभर लागू हुने गरी अर्को चरणको कर्मचारी कटौती हुने हामीले अपेक्षा गरेका छैनौँ। हामीले आफ्नो सञ्चार र संवादलाई जति स्पष्ट बनाउनुपर्ने थियो, त्यसो गर्न सकेनौँ भन्ने कुरा म स्वीकार गर्छु। यो यस्तो क्षेत्र हो जहाँ हामीले निश्चित रूपमा सुधार गर्नैपर्छ।'
तर, जकरबर्गको यो आश्वासनलाई कर्मचारीहरूले भने सहजै पत्याएका छैनन्। उनले प्रयोग गरेका 'कम्पनीव्यापी' र 'अपेक्षा' जस्ता शब्दहरूलाई उद्धृत गर्दै कर्मचारीहरूले सामाजिक सञ्जालमा विभिन्न टिप्पणी गरेका छन्। जकरबर्गको पोस्टमा टिप्पणी गर्दै एक कर्मचारीले लेखेका छन्, 'कुराहरू कहिलेकाहीँ "अप्रत्याशित" रूपमा पनि अगाडि बढ्छन्।' यस विषयमा मेटाका प्रवक्ताले भने कुनै पनि आधिकारिक प्रतिक्रिया दिन अस्वीकार गरेका छन्।
मेटाले यस वर्ष आन्तरिक कार्यप्रणाली र आफ्ना उत्पादनहरूमा एआई एजेन्टहरूलाई केन्द्रमा राख्ने रणनीति लिएको छ। एआई क्षेत्रमा लगानी बढाउनकै लागि यो ठूलो फेरबदल गरिएको हो। यसअघि रोयटर्सले मेटाले यस वर्षको अन्त्यतिर अझ ठूलो संख्यामा कर्मचारी कटौती गर्ने योजना बनाइरहेको समाचार सार्वजनिक गरेको थियो, जसका कारण कर्मचारीहरू अझै पनि सशंकित देखिन्छन्।
