.gif)
 (1).png){kind=logo}
.png)
देउवासँग संवादको प्रयास असफल भएको गगन थापाको ब्रिफिङ
काठमाडौं : नेपाली कांग्रेसका सभापति गगन थापाले पूर्वसभापति शेरबहादुर देउवासँग पार्टीभित्रको विवाद समाधानका लागि संवाद गर्ने प्रयास सफल हुन नसकेको बताएका छन्। दुई दिनसम्म चलेको केन्द्रीय समिति बैठकमा सभापति थापाले पार्टीभित्रको असमझदारी अन्त्य गर्न आफूले देउवासँग प्रत्यक्ष संवाद गर्न खोजे पनि भेटको समय नपाएको जानकारी गराएका हुन्।
बैठकमा थापाले देउवाको सचिवालयमार्फत आफूले चारपटक भेटका लागि समय मागेको तर भेट हुन नसकेको बताएका थिए। उनका अनुसार देउवाका सचिवालयका साथै उनीनिकट नेताहरूबाट समेत संवादका लागि सकारात्मक पहल हुन सकेन। बैठकमा सहभागी एक नेताका अनुसार थापाले देउवासँग संवादको वातावरण नै नबनेको विषयलाई पार्टी एकतासँग जोडेर प्रस्तुत गरेका थिए। उनका अनुसार पूर्वसभापतिसँग संवाद गर्न नसकिएको अवस्थाले पार्टीभित्रको दूरी कायमै रहेको देखाएको थापाको निष्कर्ष थियो।
यसैबीच, सभापति थापाले कांग्रेसका नेता पूर्णबहादुर खड्का र डा. शेखर कोइरालासँग भने भएको छलफल सकारात्मक रहेको जानकारी बैठकलाई गराएका थिए। खड्का र कोइरालासँगको संवादका क्रममा उठाइएका माग सम्बोधन गर्न पार्टी नेतृत्वले लचकता अपनाएको पनि थापाले बताएका थिए। विशेषगरी क्रियाशील सदस्यता अद्यावधिक हुन नसकेका सदस्यलाई समेत महाधिवेशनमा सहभागी गराउने निर्णय उनीहरूको प्रमुख मागसँग जोडिएको थापाको भनाइ थियो।
कांग्रेसभित्र महाधिवेशनको तयारीसँगै नेतृत्व र विभिन्न समूहबीच देखिएको असमझदारी समाधान गर्न शीर्ष नेताहरूबीच संवादको प्रयास भइरहेको छ। तर देउवासँग प्रत्यक्ष भेटवार्ता हुन नसकेको विषयले पार्टीभित्रको आन्तरिक विवाद अझै पूर्ण रूपमा समाधान नभएको संकेत गरेको छ।
