.gif)
 (1).png){kind=logo}
.png)
प्रधानमन्त्री शाहसँग गुटेरेसले भने : पदबाट निवृत्त भएपछि पनि नेपाललाई सहयोग गरिरहन्छु
काठमाडौं : संयुक्त राष्ट्रसंघका महासचिव एन्टोनियो गुटेरेसले आफ्नो कार्यकाल सकिएपछि पनि नेपाललाई सहयोग गरिरहने प्रतिबद्धता व्यक्त गरेका छन्।
न्युयोर्कस्थित संयुक्त राष्ट्रसंघको मुख्यालयमा प्रधानमन्त्री बालेन्द्र शाहसँग भएको भेटवार्ताका क्रममा गुटेरेसले नेपालसँग आफ्नो लामो समयदेखिको सम्बन्ध स्मरण गर्दै यस्तो प्रतिबद्धता जनाएका हुन्।
स्थानीय समयअनुसार बिहीबार साँझ भएको भेटमा गुटेरेसले भोटेकोशी विपद्मा भएको जनधनको क्षतिप्रति गहिरो समवेदना व्यक्त गर्दै जलवायु परिवर्तनका मुद्दामा संयुक्त राष्ट्रसंघ नेपालसँग ऐक्यबद्ध रहेको बताएका थिए।
प्रधानमन्त्रीको सचिवालयका अनुसार गुटेरेसले युवा नेपाली प्रतिनिधिमण्डलको समेत प्रशंसा गरेका थिए। उनले आफू सन् १९७८ मा पर्यटकका रूपमा नेपाल आएको स्मरण गर्दै पदबाट निवृत्त भएपछि पनि नेपाललाई सहयोग गर्ने बताएका हुन्।
भेटमा प्रधानमन्त्री शाहले नेपालप्रति देखाएको सद्भावका लागि गुटेरेसलाई धन्यवाद दिँदै उनको कार्यकाल सफलताको शुभकामना दिएका थिए। प्रधानमन्त्री शाहले भोटेकोशी विपद्बाट नेपालले ठूलो जनधनको क्षति बेहोरेको उल्लेख गर्दै हिमताल फुट्ने जोखिम अझै उच्च रहेको बताएका थिए।
वार्तामा नदी किनारका बासिन्दाको पुनर्वास तथा हरित पुनर्निर्माणका विषयमा समेत छलफल भएको थियो। त्यस्तै, अतिकम विकसित राष्ट्र (एलडीसी)को सूचीबाट नेपालको स्तरोन्नतिको समयसीमा थप गर्न आवश्यक समर्थनबारे पनि कुराकानी भएको प्रधानमन्त्रीको सचिवालयले जनाएको छ।
प्रधानमन्त्री शाह संयुक्त राष्ट्रसंघको ८१औँ महासभाको उच्चस्तरीय सप्ताहमा सहभागी हुन न्युयोर्क पुगेका हुन्। गुटेरेससँगको भेटपछि उनले महासभालाई सम्बोधन गरेका थिए।
