.gif)
 (1).png){kind=logo}
.png)
बङ्गलादेशमा ट्रक दुर्घटना: चाड मनाउन घर फर्किँदै गरेका १५ मजदुरको मृत्यु
ट्रकले बाटोमा हिचहाइक (लिफ्ट मागेका) यात्रुहरूलाई चढाएर राजधानी ढाकाबाट उत्तरी क्षेत्रतर्फ लैजाँदै
काठमाडौँः मध्य बङ्गलादेशको एक प्रमुख राजमार्गमा सोमबार बिहान भएको भयानक ट्रक दुर्घटनामा परी कम्तीमा १५ जनाको ज्यान गएको छ भने अन्य १० जना गम्भीर घाइते भएका छन्। फलामको रड र क्षमताभन्दा बढी यात्रु बोकेको उक्त ट्रक अनियन्त्रित भई पल्टिँदा ठूलो सङ्ख्यामा मानवीय क्षति भएको स्थानीय प्रहरीले पुष्टि गरेको छ।
यो दुःखद दुर्घटना राजधानी ढाकाबाट झण्डै ८३ किलोमिटर उत्तर–पश्चिम दिशामा अवस्थित टाङ्गैल जिल्लाको सोराटोल भन्ने ठाउँमा बिहान करिब ५ बजे भएको हो। स्थानीय प्रहरी प्रमुख फुआद हुसेनका अनुसार तीव्र गतिमा रहेको ट्रकका चालकले अचानक नियन्त्रण गुमाएपछि सवारी सडकको बीचमै पल्टिन पुगेको थियो।
प्रहरी प्रमुख हुसेनले दिएको जानकारी अनुसार उक्त ट्रकले बाटोमा हिचहाइक (लिफ्ट मागेका) यात्रुहरूलाई चढाएर राजधानी ढाकाबाट उत्तरी क्षेत्रतर्फ लैजाँदै थियो। दुर्घटना यति शक्तिशाली थियो कि धेरैजसो यात्रुहरूको घटनास्थलमै ज्यान गएको थियो।
यो दर्दनाक घटना मुस्लिम समुदायको ठूलो पर्व 'ईद अल–अधा' को पूर्वसन्ध्यामा भएको हो, जुन आगामी बिहीबार मनाइँदै छ। चाडपर्व नजिकिएसँगै आफ्नो परिवारसँग भेटघाट गर्न यतिबेला बङ्गलादेशभर यात्रुहरूको ठूलो चहलपहल भइरहेको छ।
प्रहरीका अनुसार दुर्घटनाको शिकार भएकामध्ये अधिकांश दैनिक ज्यालादारीमा काम गर्ने विपन्न मजदुरहरू रहेका छन्। उनीहरू वर्षदिनको चाड मनाउन र परिवारसँग खुसी साट्न आफ्नो थातथलो फर्कने क्रममा यो दुर्घटनामा परेका हुन्।
दुर्घटनाका प्रत्यक्षदर्शीहरूले स्थानीय टेलिभिजन च्यानलहरूलाई बताए अनुसार बिहानै ठूलो आवाज सुनेपछि उनीहरू दौडिएर घटनास्थलमा पुगेका थिए र ट्रकभित्र फसेका यात्रुहरूलाई उद्धार गर्न सुरु गरेका थिए।
करिब १७ करोडभन्दा बढी जनसङ्ख्या भएको बङ्गलादेशमा यस्ता भयानक सडक दुर्घटनाहरू नियमित जस्तै हुने गरेका छन्। ट्राफिक नियमको फितलो पालना, सडकको जीर्ण अवस्था र चालकहरूको लापरबाहीका कारण बङ्गलादेशमा हरेक वर्ष हजारौँ नागरिकले सडक दुर्घटनामा ज्यान गुमाउनु परिरहेको सरकारी अधिकारीहरू स्वीकार गर्छन्।
