.gif)
 (1).png){kind=logo}
.png)
डढेलो नियन्त्रणमा पनि गोर्खा सैनिक उत्कृष्ट
दक्षिण वेल्समा डढेलो नियन्त्रणमा खटिएका गोर्खा सैनिकको कामको प्रशंसा
बेलायत : दक्षिण वेल्समा फैलिएको डढेलो नियन्त्रणमा खटिएका अग्निनियन्त्रकहरूलाई सहयोग गरिरहेका सैनिकहरूको प्रमुख अग्नि अधिकारीले प्रशंसा गरेका छन्। साउथ वेल्स फायर एन्ड रेस्क्यु सर्भिसका प्रमुख अग्नि अधिकारी फिन मोनाहनले आफ्नो सेवामाथि अत्यधिक दबाब रहेको भन्दै सहयोगका लागि बेलायतका अन्य सातवटा अग्नि सेवा र सेनाप्रति आभार व्यक्त गरेका छन्।
डढेलो नियन्त्रणका लागि क्विन्स ओन गोर्खा लजिस्टिक रेजिमेन्टका करिब २०० जना सैनिक खटिएका छन्। उनीहरूलाई २२ रोयल इन्जिनियर्स, रोयल लजिस्टिक्स कोर्प्स र सेनाका हेलिकप्टरले समेत सहयोग गरिरहेका छन्।
लन्डन, कम्ब्रिया लगायत बेलायतका विभिन्न क्षेत्रका अग्नि नियन्त्रक टोली पनि डढेलो नियन्त्रणका लागि दक्षिण वेल्स पुगेका छन्। बीबीसीसँग कुरा गर्दै मोनाहनले डढेलो नियन्त्रणमा सेनालाई परिचालन गर्ने निर्णय बेलायत र वेल्स सरकारले ‘अत्यन्त गम्भीर कदम’का रूपमा लिएको बताए। तर देशभर दर्जनौँ डढेलो एकैपटक नियन्त्रण गर्नुपर्ने अवस्था रहेकाले थप जनशक्ति र स्रोतसाधन आवश्यक भएको उनको भनाइ छ।
उनले अग्नि नियन्त्रकहरूसँग डढेलो नियन्त्रणका लागि ‘विशेष सीप’ रहेको भन्दै सेनाको सहयोगले ती विशेषज्ञ जनशक्तिलाई आवश्यक पर्ने स्थानमा केन्द्रित गर्न सहज भएको बताए। सैनिकहरूले अग्नि नियन्त्रक तथा अन्य विशेषज्ञ उद्धार टोलीलाई आवश्यक पर्ने पानी वितरणलगायतका लजिस्टिक सहयोग गरिरहेका छन्। गोर्खा सैनिकहरूले डढेलो नियन्त्रणका लागि खाडल खन्ने तथा आगो फैलिन नदिने ‘फायर ब्रेक’ निर्माण गर्न समेत सहयोग गरिरहेको मोनाहनले बताए।
उनले गोर्खा सैनिकहरूको कामको प्रशंसा गर्दै उनीहरूले ‘अत्यन्तै उत्कृष्ट काम’ गरिरहेको बताए। सैनिकहरूले खाडल खन्ने र आगो फैलिन नदिने क्षेत्र निर्माणमा सहयोग गरेपछि अग्नि नियन्त्रकहरूलाई आफ्नो विशेष दक्षताअनुसार डढेलो नियन्त्रणमा केन्द्रित हुन सहज भएको उनको भनाइ छ।
दक्षिण वेल्समा आइतबार मात्रै करिब १४ वटा छुट्टाछुट्टै डढेलो नियन्त्रणमा लिन अग्नि नियन्त्रक टोली परिचालन भएका थिए। मिड एन्ड वेस्ट वेल्स फायर एन्ड रेस्क्यु सर्भिसका अनुसार आइतबार कार्मार्थेनसायरको रान्डिर्म्विन र अमानफोर्ड तथा पाविसको हे–अन–वाई र ब्रेकन क्षेत्रमा डढेलो नियन्त्रणका लागि टोली खटिएका थिए।
त्यसैगरी स्वान्सीको गोर्सिनन, पेम्ब्रोकशायरको टेनबी र कार्मार्थेनसायरको लानेली क्षेत्रमा पनि आगलागी तथा धुवाँसम्बन्धी घटनामा अग्नि नियन्त्रकहरू परिचालन भएका थिए। रोन्डा एन्ड ओगमोरका सांसद क्रिस ब्रायन्टले रोन्डा सिनोन टाफको ट्रेहर्बर्टमा लागेको डढेलोलाई ‘भयानक’ भन्दै अग्नि नियन्त्रकहरूको प्रशंसा गरेका छन्। उनले सहयोगका लागि लन्डनबाट आएका अग्नि नियन्त्रक टोलीप्रति पनि आभार व्यक्त गरे।
उनले बेलायतका विभिन्न ठाउँबाट आएका दमकल र दुईवटा हेलिकप्टरले डढेलो नियन्त्रणमा सहयोग गरिरहेको उल्लेख गर्दै अग्नि नियन्त्रकहरूको कामबाट आफू निकै प्रभावित भएको बताए। तर यस्तो अवस्था नियमित बन्न नहुने उनको भनाइ थियो। मोनाहनले आगो नियन्त्रणका लागि आवश्यक पानीको व्यवस्थापनमा रोयल लजिस्टिक्स कोर्प्स र रोयल इन्जिनियर्सले महत्वपूर्ण भूमिका निर्वाह गरिरहेको बताए।
‘वेल्सको पानी प्रणालीमाथि दबाब छ। त्यसैले जहाँ पानी उपलब्ध छ, त्यहाँबाट ठूलो परिमाणमा पानी आगलागी नियन्त्रण भइरहेको क्षेत्रमा पुर्याइरहेका छन्, ताकि पानीको प्रणालीमाथि थप दबाब नपरोस्,’ उनले भने। शुक्रबार बेलायत सरकारले इंग्ल्यान्ड र वेल्सका नागरिकको मोबाइलमा पठाएको राष्ट्रिय आपत्कालीन अग्नि चेतावनी पनि आवश्यक रहेको मोनाहनले बताए।
तर चेतावनी जारी भइसकेपछि पनि केही मानिसले डढेलोको जोखिमलाई गम्भीर रूपमा नलिएकोमा उनले असन्तुष्टि जनाए। उनले एउटा रुखमुनि टायर जलाइरहेको व्यक्तिलाई आफूले भेटेको उदाहरण दिँदै यस्तो व्यवहार गैरजिम्मेवार भएको बताए।
दक्षिण वेल्समा फैलिएको डढेलो नियन्त्रणका लागि स्थानीय अग्नि नियन्त्रकसहित बेलायतका विभिन्न क्षेत्रबाट आएका टोली र नेपाली मूलका गोर्खा सैनिक परिचालन भएपछि उद्धार तथा नियन्त्रण प्रयासलाई थप बल पुगेको अधिकारीहरूले बताएका छन्।
- बीबीसी
